Saunoaga a le Palemia i le Tatalaina o le SNDP

September 18, 2019

227

SAUNOAGA AUTU AFIOGA I LE ALII PALEMIA, HON. TUILAEPA SAILELE MALIELEGAOI I LE TATALAINA O LE VAEGA FAAUPUFAI “SAMOA NATIONAL DEMOCRATIC PARTY” – TUUTUUILELOLOTO HALL, MULIVAI ASO LULU, 11 SETEMA 2019, 10:00 A.M

Ou te fa’atalofa i lenei taeao fou i le maleifua mai i faguga lelei, pa’ia o le pulega o le tou Vaega Fa’a’upufai, lau Afioga i le Pelesitene ma nofoātofi o le tou Laulau. O Pa’ia fo’i o Samoa i ona tulaga faalupelupe auā ‘Āiga ma latou tama fa’apea le Usoga a Tumua ma Puleono i Salafai tainane le faanōnōgā manū a le ‘Aufaigaluega totofi a le Atua ua ta’oto a o se ala o’o. O outou Sā ma Faigā, taalolo.

O le vala’auina o a’u nei ‘ou te savalivali mai e fai sina ‘upu fa’ala’ei’au auā lou tou faamoemoe i lenei taeao fou, sa ‘ou tau fesili pe tatau ‘ona ‘ou sau auā o le ‘autū o lou tou faamoemoe e lē ōgatasi ma le ‘auga o ‘aute na faatū ai foi le HRPP.

Afai la na faapogai le vala’au ‘ona o a’u o le Taitai o le Palemene e faapei ona faalupe ai le tofiga o lo o ‘ou ‘ūmia, toe tou moomia lo’u savalivali mai ma ‘ū’u ‘ū’u mai ma se meaalofa tupe a le HRPP, o lenā tonu lava ‘ua lua ai tou mea sa’o. Ma o le meaalofa lea a le HRPP e $2,000 – tuu atu i le Failautusi.

O le mafutaga i lenei taeao, ua fa’ataunuu ai ma le poloa’iga a lo tatou Alii, “Ia outou fealofani”. A o isi fetalaiga tāua tele mo i tatou uma e afio le Atua i totonu o tatou tagata – Pe ‘ā tatou manatua ia Afioga mamana toe pa’ia tele, e lē tatau lava la ‘ona i ai se fefulituaa’i ma se fe’ino’inoa’i i le lalolagi o lo o tatou soifua ai. Peita’i e tupulua pea le saito ma le titania.

O mea nei o Vaega Fa’a’upufai e tu’ulima atu ai i o tatou tagata le filifiliga o le itū’āiga Vaega Fa’a’upufai e faafoea le Mālō. Ina ia faafaigofie le filifiliga a le ‘au palota i le sui faatū ma lana Vaega Fa’a’upufai e palota i ai e ao ona manino ana fuafuaga alualu mamao i le lumana’i o le ‘ā faafoe ai le Mālō pe ‘ā tūmālō. Lona uiga e tilotilo le tagata palota i fuafuaga mamao a le Vaega, toe tilotilo i tagata o lo o fa’afoea pe talitonuina – o nisi na o itū tāua e tapena mae’ae’a iai le Vaega Fa’a’upufai. Ina ia tūmālō i se faigāpālota lautele, ia matuā galulue latou o fa’afoea le Vaega Fa’a’upufai, i fuafuaga loloto e ‘au’auna ai iā Samoa ia sili atu nai lo le Vaega o lo o tula’i i le foe o le Sā o Samoa. Lona uiga, ia matuā talitonuina mau e tuu atu i le atunuu. E lē manofonofo le Vāega o lo o tūmālō e matuā sauni lelei e talepe ia masofasofa manatu lē fa’avaea e lu’itauina ai finagalo o latou e faia filifiliga o Ta’ita’i o le atunu’u mo so o se Paea’iga fou o lana Palemene.

Talu mai ‘ona filifilia i faigapalota lautele le HRPP e faafoea le Mālō o Samoa i le 1982 e tau mai i le asō, tusa lea ua 9 Faigāpalota lautele soso’o o lagolago pea e le atunuu le HRPP e tau mai i le taimi lenei, ua lē masino teuteuga o Tulafono o faigāpālota ‘ina ‘ia tau tuuitiitia ai uiga fa’asolitulāfono e lapelapea ai le filifiliga sa’oloto a le tagata palota. A o le natura o le sui finau e faumālō, e tula’i mai ai pea itu’āiga metotia ‘ese’ese e maulu ai le sui fa’atū, o le fa’apogai lea e tai lē sao se faigāpalota ma faamasinoga e lu’i ai e le sui ua malolo le sui ua manumālō. O aga masani ia o finauga ma faigāpalota a so o se atunu’u temokalasi. O faigāmālō ia e fa’avae i le itū e fulisia iai le lagolago a tagata lautele.

Nei, ua tapu ni o’o e toe faia a o lumana’i faigāpalota ‘ona o faiga ia e fa’aaogā ai e sui e tetelē lo latou tamāoaiga seleni e fa’atosina ai le ekisi. Lea ua faatulāfono ia fai o’o o Sui ‘ua filifilia i totonu o le 2 tausaga ‘ina ‘ua mae’a faigāpālota. Ae taofi le faiga tuai masani o le fai o o’o ‘ae toe o ni aso fai le faigāpālota. E lē maua ai i ia faiga tuai ni filifiliga amiotonu o sui-a-faipule o le Palemene.

Tāua tele i le Vaega Fa’a’upufai ‘ona faamalamalama i o latou Sui fa’atutū tulāfono o faigāpālota e ao ‘ona feso’ota’i ai pea lava pea ma le tatou Ofisa o Faigāpālota ia nofo manino sui uma o le Patī i mea e tatau ona faia e Sui faatutū. Ia amata mai i ta’ita’i ona fai mea ia. O Ta’ita’i fo’i latou, e tausolomua i le fai o fa’ata’ita’iga lelei. E pi’opi’o loa ta’ita’i ‘ona fa’asapasapa atu ai fo’i lea ma le Vaega ‘atoa. E mamafatū tiute o le Ta’ita’i, mo se faata’ita’iga, e iai le isi fo’i ta’ita’i o se Vaega Fa’aupufai fou na ‘ou fa’amalo iai. O la’u ‘upu faatoea’ina na fai “silasila mai i laulu o lo’u ulu, ‘ua sina i le mamafatū o le ‘avega e amo e le Ta’ita’i, a o ‘oe, lea fa’ato’ā lua ou aso ‘ae ‘ua matuā molemole lou ulu ‘ua leai se lauao. I nai masina o loo totoe mo le isi faigāpālota e oo atu i ai ua faapenā foi ‘oulua Vui Masina ma Tafito.

O tatou tagata fo’i, ua matuā popoto i ‘auala ‘ese’ese e fai e sui fa’atutū ‘ina ‘ia maua ai le manumālō. Mo sina fa’ata’ita’iga, na pāsia e le Palemene o Samoa le tulāfono o ID i le Paea’iga o le 1982-1985 e taofi ai le toe palota solitulāfono o se tagata i le igoa o se tasi ‘ua oti ‘ae o lo o i ai pea le igoa i le lola palota. E fofō atu lenā gasegase ‘ae totogo a’e ai ma le isi uiga solitulāfono o le nofonofo o sui palota e lē fia lesitala se’iloga e alu atu le sui fa’atū ma lana ta’avale e ‘aumai ai e lesitala ma monomono atu ai ma lana mea mamā. Uma ane le lesitala, ua oo i le 10 IDs fa’alesitala e sui tauvā ‘uma o le Itūmālō. Ae ‘ua lē masino sāvali a fale’upolu iloga o le Itūmālō e momoli atu Simi – o le faipule lava lea o le Itūmālō. Fa vaiaso ae toe o atu fo’i momoli atu Sione. Toe o atu foi momoli atu Sieni ma le fagogo lava lea e tasi, “o le tofi lava lea mai le Atua o lenei Itūmālō.” Ma ta’u ai lava le suafa o le Atua. Leai se mea e fou i lalo o le la. O la’u mātau atu fo’i i le tumutumu mai o sui ‘auai i lenei taeao o le ulua’i aso fanau o le SNDP – fa’amālō le sa’ilimālō. A vala’au fo’i le tauaofiaga i lea vaiaso a le HRPP – e toe va’aia fo’i foliga lava e tasi – tutusa lelei. O uiga sa’ilimālō matagofie ia fa’afaleupolu tatou te mitamita uma ai i le talenia tele o tatou tagata i le tomai fa’apolokiki. Pau lenei o le atunuu fai mai papālagi, e fanau mai loa le Samoa, polokiki loa. E lē o ni fasi polokiki fo’i – O le matuā mea malosi toe tutu’a. Ua lē tasi ae ua lasi le mau sui fa’atutū e fia faipule e uma ane faigāpālota sa finau ai i le tofi, ua fa’atautu’i fale ma fanua e totogi ai ‘āvega o faigāpālota, po o le tete’a ai fo’i o isi ma a latou tautoga.

Ou te manatua ai lo’u fa’ato’ā ‘auai i la’u ulua’i palota o a’u o le sui fa’atū. Ua ou te’i i le telefoni atu o le Tama ‘Autū a le isi sui fa’atū o le matou Itūmālō fai mai – “Tuila’epa – lenā e te iloa o a’u lea e ta’ita’i i le campaign a le Toeaina lea e te lua tauvā. ‘Ou te mana’o ‘ia e iloa o a’u ma lo’u ‘āiga ‘ātoa, matou te palota fa’alilolilo ia te ‘oe taeao. O ‘upu a lo’u tama ‘ua maliu ia matou lagolago oe.” A o ‘upu a le isi sui na malolo i faigāpālota i Faasalele’aga o mea nei o faigāpālota e ‘ai ai e le vale le afu o le poto”. O ia lenā, na ulua’i fauina le alagā’upu lauiloa lenei ‘ina ‘ua gaogao ‘i’i lona fale’oloa ‘ae iloa mulimuli ane le isi toea’ina fa’asegosego le pupula o lo o pito i telē lana ‘aitalafu, e ‘ese le sui na palota iai. O le ‘au’au o le Taofi – fa’amalo i Ta’ita’i o le SNDP i lou tou fa’ama’ite mea lelei. O se manatu lelei le fa’atū o se Vaega Fa’a’upufai. O le ‘auala o lo o ta’oto i outou luma, e gaoā pei fo’i ona asa e tamā o le HRPP ua fai i lagi le folauga. O le pulega o se Mālō o se matāfaioi e mamana, e pa’ia, e lē faata’aloga i vai pe utuvai tofo iai se isi ona o le Mālō o Samoa e i ai lona fa’avae papa – O le Atua lea o le lagi ma le lalolagi. O le Atua o le tatou Fa’avae. Ia manatua ai e ta’ita’i o so o se Vaega Fa’a’upufai, o loo fa’amasino le Atua ia i tatou uma o Ta’ita’i o Faalapotopotoga, po o le a lava le matāfaioi po o le faa-Ekalesia, faalenu’u, po o le fa’apolokiki – O lo o lotolotoi ai le Atua e afio i le mea lilo – Na te tō manū, na te to’ia fo’i i mala i latou ‘uma e lē fa’aaogā tatau le taleni foa’i fua mai e lō tatou Matai Sili.

Ia manuia tele le asō ma lou tou fa’amoemoe o le fa’alauiloa o lau tou Patī fou.

Ona o lo o i ai o’u mau tuatuagia o le ‘ā ‘ou tu’ua ai le mea nei. E lē tatau fo’i ‘ona ‘ou fa’alogologo fua ia outou fuafuaga fa’a’aulo e lē sa’oloto ai lau tou felafolafoa’iga.
Soifua.