E $50 miliona le aitalafu a le kamupani vaalele a le Samoa Airways i le UTOS lea ua iai se vaega ua toe faafoi i le Malo mo le totogiina.
Na faamaonia mai lea tulaga e le afioga i le Minisita o Pisinisi, Alamanuia ma Leipa, Hon Leatinuu Sooialo Wayne Fong.
Saunoa Leatinuu, e $25 miliona o loo togitogi lava e le kamupani vaalele a le Samoa Airways i le taimi nei.
“O tupe e maua mai i lana auaunaga o loo lele ai i le va o Samoa e lua lea o loo togitogi ai lea vaega o le aitalafu.”
I le Tala Faatatau o le Tupe 2023/2024 ua pasia nei i le Maota, e $4 miliona tala o loo faamatuu atu mo le Samoa Airways.
Saunoa Leatinuu, o lea $4 miliona o loo tuuina atu e le Malo e fesoasoani ai i vaega eseese o le auaunaga a le Samoa Airways.
“E pei o le togitogiina o lafoga a tagata faigaluega e le’i totogia, ma fesoasoao i le tau o suauu.”
O lea foi seleni ua tuuina atu mo le toe totogiina atu lea o seleni poo le refund mo pepa malaga sa tuuina atu le mamalu o le atunuu ae le’i oo mai le faamai o le koviti lea na tapunia ai faigamalaga.
O le isi itu taugata mo kamupani vaalele o le totogiina lea o le tu laueleele o le vaa (landing and parking fees) lea e totogi agai le Pulega o Malae Vaalele le Samoa Airport Authority.
Saunoa le Minisita, e $8 miliona le tau aofai o ticket poo pepa malaga ua maea ona totogiina atu i le Samoa Airways, ae lei tulai mai le taofiga o faigamalaga faavaomalo.
Ae peitai, e toe faafoi le vaalele, e le o iai se $8 miliona o taatia ese, e ui ina le’i faataunuuina faigamalaga.
“Ua leai foi se $8 miliona o tau o ticket na tuuina atu e le mamalu o pasese.. lea la o loo tau togitogi i le taimi nei.”
Sa suia e le Faigamalo le pulega a le Samoa Airways ina ua tulai mai, ma tuuina atu iai le afioga ia Fauoo Fatu Tielu.
Sa saunoa Fauoo ina ua faatoa oo atu, sa ia fuafuaina lava le faagasologa o refunds, ma le talitonuga e oo mai i le tausaga nei o loo faauma mai pea le togitogiina.
I lena foi taimi na saunoa ai Fauoo, sa alu le $3 miliona e totogi ai le faamalologa (redundancies) o le aufaigaluega e toa 50, ae sa totoe ai le aufaigaluega e toa 140.
E le’i mamao atu na faailoa ai e Fauoo, e ui ina oo se siitaga o pasese a le Samoa Airways i le va o Samoa e lua, ona o le siitia foi o le tau e faatino ai le auaunaga.
Ina ua faatoa tatalaina le Samoa Airways i le tausaga 2016, sa lipotia ai se polofiti (nett profit) e $4.6 miliona tala, ae $24.1 miliona tala tupe maua i lena tausaga, ma tupe alu e $19.2 miliona.
Faasilasilaga – Public Notices
