Ua faamaonia mai e le afioga Leiataualesa Jerry Brunt, o le Peresetene o le Manaia Events Incorporated, e toavalu tamaitai o le a tauva e sailia ai se tausala o Samoa mo le 2022.
Saunoa Leiataualesa i se faatalatalanoaga i le motu tele i Salafai, “O tamaitai e toavalu e aofia ai tausala e toalua mai Samoa nei.
O i laua nei o loo lagolagoina e le Samoa Stationary Books (SSAB) faapea le Samoa Peforming Arts.
E toatasi le tausala mai Niu Sila, ae o tausala mai Ausetalia, e toafa i latou.
O Ausetalia o loo faaulu mai e le Community i Ausetalia; Miss Samoa Victoria Incoporated, Miss Samoa Melbourne Australia, Miss Samoa New South Wales ma le Miss Samoa na faaulu mai e le Princess Mariana Publishing Australia.
O le toavalu ai o tamaitai, o se sui e tasi mai Los Angeles i Amerika.
Saunoa Leiataua, “Atonu o se amataga lelei foi lea i le toe faataunuuina ai o lenei tauvaga, sa toafia ona o le koviti.
“Talu ona tuanai le tolu tausaga e lei toe faataunuuina ona o faama’i, peitai, o loo tumau pea le maualuga o lenei tauvaga ona o le fuainumera o i latou o le a sailia iai se tausala o Samoa.”
O le interview poo faatalanoaga i mataupu mo le atinaeiina o Samoa le isi faailoga tāua o le tauvaga.
O le Miss Internet, e mafai ona palota iai le mamalu o le atunuu faapea soo se tasi mai itu eseese o le kelope i luga o le Facebook a le Miss Samoa Pageant.
O le siva Samoa ma le taleni nisi foi ia o faailoga e faaopoopo uma maka, ona maua ai lea o se tausala mo Samoa.
O le tausala o Samoa, Fonoifafo McFarland Seumanu, lea na ia tauaveina le tofiga mai le 2019 seia oo mai i le 2022.
O le a ia faapaleina se tasi o le a filifilia i le po o le Aso Toanai nei, lea o le a taualuga iai polokalame o le Teuila, poo le faamanatuina o le 60 Tausaga o le Tutoatasi o Samoa.
(0)
