SAUNOAGA FA’APITOA A LE AFIOGA I LE PALEMIA, FIAME NAOMI MATAAFA I LE SAUNIGA FA’ALEMĀLŌ MO LE SUSUGA I LE APOSETOLO VILIAMU MAFO’E UA TU’UMĀLŌ
Aso Gafua, 24 Aperila 2023
Ou te muamua ona fa’atulou atu i le susū a lau susuga o le Ta’ita’i o le sauniga ma lou auva’a, afifio Ta’ita’i o le Ekalesia Aoao o le Worship Center, fa’apea fo’i le aufaigaluega totofi a le Atua.
Tulouna le afifio o ‘āiga, paolo ma gafa, tainane le pāia o Samoa ua potopoto, e fa’apea uō ma e masani, ua o tatou molimauina lenei sauniga. O le taeao o le manumālō ma le oliolisaga o le nofoali’i o le alofa tunoa, ina ua taunu’u atu lana auauna nei, le susuga i le Aposetolo Viliamu Mafo’e.
Afai e ulufia lagi o matagofie i le fa’avauvau, ona tagi lea o le fatu ma le ‘ele’ele, ma goga le fau gagana. Peita’i, e fa’amafanafanaina pea i tatou i lo tatou mautinoa, o le lagi o lō tatou nu’u moni, ua saunia mo le fanau a le Atua.
Ou te fa’afetai atu i le Ekalesia, aemaise le faletua iā Lavina ma le nofoaalo, ua maua se avanoa o le Mālō, e fai ai se molimau ma se fa’afetai i le soifua auauna o le susuga i le Aposetolo, o le Ta’ita’i Aoao o le Ekalesia Worship Center i Samoa ma le lalolagi.
Auā e tatau le fa’aaloalo i ē ua tatau i ai, aemaise lava i le tulaga Ta’ita’i o Viliamu i le Ekalesia Aoao, lea lava ua valā’au e Le Atua e fa’amanava ana galuega, o lo’o galue pea. O aga ia fa’alemālō.
E mātauina pea mai lea āugatupulaga i lea āugatupulaga, fesuiā’iga o lu’itau, e feagai ma o tatou tagata, aemaise o tupulaga talavou. Sa mātauina fo’i mai i le tele o tausaga, fetu’utu’una’iga o le soifua tapua’i ma le fa’anōnōgāmanū a Samoa i Le Atua.
O le aso ma lona filiga, o le lou ma lona fuata. O le talutalu fou o fesuiā’iga o le gaoioi mai o le Agaga o Le Atua, na matuā iloga ai le sao o le Aposetolo o Viliamu Mafo’e, e fa’amalieina le galala fa’aleagaga o ō tatou tagata.
E mafai ai ona fa’apea, o Viliamu o se tasi o poutū toa na fa’afaileleina soifua fa’aleagaga o le to’atele, mai lava i le vaitaimi na avea ai ma Fa’atonu o le Autalavou mo Keriso, se’ia o’o ina fa’atūina le Ekalesia Worship Center – ma valā’auina e lona Matai na te ta’ita’ia le Ekalesia.
O le susuga iā Viliamu Mafo’e sa avea ma sulu fa’asino ala na tumau ai le fa’asinomaga ma le anofale o le soifua auauna i le Atua, o i latou uma sa ia a’oa’oina ma fa’aso’oina.
O le molimau, ua fa’atupuina le Tala Lelei ma ua o’oo’o i isi atunu’u o le lalolagi le galuega a le Worship Center, ona sa ia apelepelea le ola taumafai ma sa’afi i fa’atufugaga o le manumālōina o agaga, mo le Atua ma lona Mālō.
E tele taleni ma meaalofa fa’aleagaga sa fa’aoloaina ai lana auauna nei. Sa ia galue ma fa’aāoga meaalofa fa’aleagaga e fesoasoani i le to’atele na sulu i ai mo se fesoasoani, o le anoanoa’i na fa’asa’oloto mai galuega o fetu’u ma temoni. Ma le tele o agaga na manumālōina mo le Mālō o le Atua e o’o mai i le asō, atoa ai ma lona fa’amalosi e folafola le ‘Upu a le Atua i so’o se itu’āiga ala e o’o’o’o atu ai le feau i le atunu’u ma le lalolagi. E fa’apea fo’i i lona mā’elegā e fa’aolaola le galuega fa’amisionare e ala atu i le Ekalesia Worsip Centre e fa’aauauina le finagalo o lō tatou Matai Sili, ina ia tala’i atu le Talalelei ma ia fai nu’u uma lava ma so’o.
O si o tatou Mālō Tuto’atasi, e fa’avae i le Atua soifua ma aga ma tu fa’akerisiano. Ou te talitonu, o le tasi lenei tovine e le’i mavae le soifua tatalo ma tu’uina atu pea Samoa i le Atua, a’o feagai le atunu’u ma faigatā ma futia sa o tatou folau mai ai.
O lona soifua atina’e mo le galuega a le Atua, a lenei ua tatou molimauina lenei galuega tele ma le matagofie. E fa’apea fo’i i le tuputupu pea o le aofa’i o le Ekalesia. Ia vi’ia le Atua i le soifua auauna o Viliamu ma le Ekalesia.
O le fa’asologa o Matāgaluega ma Fa’alapotopotoga a le Mālō e ta’ita’ia fono tatalo i le Maota Tatalo i le Mauga o Vaea i Aso Lulu uma, sa i ai lava ma le avanoa o le Worship Center ona o le sa’ilimālō o le Aposetolo, ia fai pea so latou sao fa’atasi ma le Mālō, i fa’anōnōgāmanū i le Atua mo le atunu’u pele. O ana saunoaga ma fa’amafanafanaga iā Samoa ma lana Faigāmālō, o le ā manatua pea.
O le fa’afetai a le tatou Mālō ona o le sao tāua o Aposetolo Viliamu Mafo’e i le tapu’eina o soifua tapua’i o Samoa i le Atua, e lē fa’aitiitia. Pau lea o le tali o so’o se fa’afitauli o lo tatou soifuaaga nei, ua na’o le Atua.
Ia fa’amafanafanaina le Faletua iā Lavina ma le nofoaalo. Ia ulu le faavauvau i le pāia o le Ekalesia mai ona Ta’ita’i aemaise le loaloa o tagata lotu. Ia fa’amafanafanaina ‘āiga e fia o le Aposetolo aemaise e o tagi mai ala.
Ia manuia lau malaga Viliamu.
Ia manūina tele lenei sauniga.
Soifua.
