I se faatalatalanoaga ma le Afioga i le Fofoga o Maota, Papalii Lio Taeu Masepau, na ia saunoa ai e faapupula lona finagalo i le mafuaaga ua toe valaauina ai le Komiti Faapalemene, lea sa latou iloiloina se tagi faasaga i le taitai ma le failautusi a le itu a gai – Ethics and Privileges Committee.
Saunoa Papalii, “Ua tilotilo ma le totoa i le faaiuga a le faamasinoga, o loo faatāua mai ai le revisit…
“O la’u la tilotilo ma la’u vaai, e le’i maea galuega a le Komiti e pei ona latou tagofia ai amioga lē taualoa..”
Saunoa le Fofoga Fetalai, o loo iai ni vaega o loo fautua mai ai le Faamasinoga, ma e tatau ona faatino ia fautuaga.
“E tatau foi ona tuuina atu se avanoa, e toe silasila ai le Palemene i ona itu uma e pei ona tuuina mai e le Faamasinoga..”
O le mau a le Fofoga Fetalai, e tele ni itu lelei o lenei mataupu, ma faafetaia foi e Papalii le faufautua mai o le Faamasinoga.
Sa fautuaina le Palemene e le Faamasinoga, e faatāua le aia tatau o Sui Mamalu e tali atu ai i moliaga, e le gata i le taimi e suesueina ai mataupu, ae faapea foi taimi e soalaupuleina ai ma fetuunai a latou faasalaga talafeagai.
Saunoa Papalii, “E tatau ona paleni itu uma, ma tuu avanoa le Komiti mo le aia tatau e faamasino ai ma le tonu, ae maise lava le taimi e tuuina mai ai faasalaga, lea ua fautuaina ai le Palemene i lana faaiuga…
“E tāua foi mo le Palemene, ona sa iai foi tulaga faapea na tulai mai le taimi ua te’a, ae le’i iai ni avanoa na maua e Sui o le Palemene, e saunoa ai”.
O le faavae na fausia e le Palemene, e aoga mo le Komiti, e aoga foi mo le Palemene auā o taualumaga e faia ma le amiotonu”.
O le vaiaso talu ai na tusi aloaia atu ai Papalii Lio Masepau, i le taitai a le Itu Agai Afioga Tuilaepa Dr Sailele Malielegaoi, faapea le tofa Lealailepule Rimoni Aiafi, e toe aloaia ona faaauau o la’ua tiute faa Faipule o le Maota.
Peitai o lea tusi, sa faailoa atu ai foi ia Tuilaepa ma Leala, le toe taloina o le Komiti Faapalemene i lea mataupu.
O se tulaga na matua’i fesiligia e le taitai a le Itu Agai ia Tuilaepa, poo le a le mafuaaga o le a toe talo ai le Komiti.
Sa saunoa Tuilaepa, poo fea lava e agai iai se finagalo o le Komiti, “e le nofonofo foi lenei itu, e agai lava e saili le mea amiotonu..”
(15)
