27 Setema, 2019 Apia Samoa. E le mafai ona matu loimata o le tina ia Susana Taulapapa o le faletua o le Afioga i le alii Satini ua fai i lagi le folauga ia Sergant Iosua Taulapapa, i se sauniga faapitoa a le Matagaluega o Leoleo, sa faia i le aso ananafi.
I faamaumauga a leoleo e tusa ma le toalima Malu o le Malo ua maliliu i totonu o le 12 masina mai ia Setema o lena tausaga seia oo mai ia Setema o le tausaga nei.
O i latou nei:
Sergeant Iosua Taulapapa – 31 tausaga 2 masina
Constable Andrew Fuimaono Sa’u – 4 tausaga 6 masina
Constable Sialaoa Papalii – 2 tausaga 11 masina
Motootua Maulolo Sakaio – 35 tausaga
Vaatiuola Lautolo Misi
Sa saunoa le Sui Palemia o Samoa le Afioga i le Sa’o Faapito ia Fiame Naomi Mataafa e fai ma sui o le Malo e amanaia le tautua a leoleo.
“Tatou te manatua pea i latou, faapea o latou aiga ma uo, e ui ua tatou valavala i le malaga a le maliu ma le oti, ae tatou te manatua pea lo outou faatuna pa’ulia ma le faa fale tului’a i galuega faa leoleo. O le a le galo le tautua.”
O le faamanuia a le Malo ma tagatanuu o Samoa i le auvaa o Malu o le Malo e ala i alii ma tamaita’i o loo maualuga lea e pei ona saunoa le tamaitai Sui Palemia, “O le a lē galo, ae manatua pea.”
O se aso faapitoa lenei i tausaga uma e masani ai le matagaluega o leoleo e le gata e faamantu ai le sao taua o leoleo ma la latou galuega, e faamanatu ai fo’i i latou sa filiga i o latou tiute ma faiva, o e sa faamanu’alia ao fegai ma galuega faapea ai foi i latou ua fai i lagi le folauga o avea pea ma Malu o le Malo o Samoa.
Sa saunoa foi le Komesina o Leoleo le Afioga ia Su’a Fuiavailiili Egon Keil i le taua o galuega feagai ai ma leoleo mo le malu puipuia o le atunuu ae a faatusa i seleni e maua, e le taitai lava. O le itu taua lena o aso faapitoa faapenei e amanaia ai ma faafetai atu ai i Alii Malu uma o le Malo o Samoa.
“E le o nisi, o tatou alo ma fanau, o tatou tamā ma tinā, lenei o loo ofoina latou soifua mo Samoa.”
Sa ta’ua foi e Su’a Fuiavailiili le taua tele o le auai ai o le Sui Palemia, faapea sui o Malo mai fafo ae maise nisi o laui’a ua maea le tautua i le Afioga ia Asi Faamatala Blakelock ma Tavui Annie Laumea.
Sa faatalanoa e le Samoa Global News le faletua o Sergeant Iosua Taulapapa, le tina ia Susana Taulapapa. E silia ma le 30 tausaga le auaunaga a lenei Satini mo le matagaluega a leoleo ma e maliu nei lava o loo faugaluega pea. E toafa nai a la alo ma sa taua e ia le faigata tele o le mafutaga motusia. O upu a le tina na ia faapea ai;
“E lagona le faagaeetia i lenei faaeaea e ui ina nutimomoia le agaga, pe a manatu i le mafutaga ua faafuasei ona tuua ma le tama ona o ma’i o le tino, ae faagaeetia ona o lana galuega sa tau lē maua se taimi mo le aiga, ona o le naunautai ina ia faatino le galuega na tauto ai;
“O lea ua faaalia i le aso, faafetai i le matagaluega o leoleo mo le amanaia o se tautua a lo’u toalua”.
O le alii Satini o Iosua Taulapapa e maliu nei o loo ia vaaia le ofisa o tusi saisai, ae sa galue ai i le tele o ofisa i totonu o le matagaluega e pei o le ofisa o le Intel, CID, aemaise ai ofisa i Lalomanu, Poutasi ma Faleolo.
