Le paia ma le maualuga o le Pulega paia ma le mamalu o le aufaigaluega aemaise Samoa ua potopoto i lenei taeao. Ou te aualofa atu ma faatalofa atu i le agaga faaaloalo e iai le manatu o le aou le toe seu tafiliina le naa o alii seu ae o le a matou seu i toaga aua o lea ua faaifo i fanua le seuga o le tautai pupula ae o le a laga ia le lupe mua i le alofa ma le agalelei o le Atua ua tatou feiloai ma feiloai fiafia ai i lenei afiafi i lona agalelei silisili.
O le ia ua maea ona aisa ma e le toe autalaina e se faamatalaga ua tatou faatasi ai nei i le manuia o le Alii ona o se faamoemoe ua taualuga iai tiute ma faiva o le pulega a le Tineimu ma Faalavelave Tutupu Faafuasei.
O lenei faamoemoe e ala i pesepesega o le Kirisimasi ua tapenaina e le Afioga i le Komesina Pulega ma le Aufaigaluega e momoli atu ai faamanuiaga o le Kirisimasi e le gata i aiga ao uo ma paaga a le pulega galulue aemaise tagata o nuu uma o Samoa.
O le mea moni e le itiiti la outou tautua o lo o faia pea mo i tatou atunuu.
Ia agalelei le Atua ma ia faamanuia i lo outou soifua tautua i si o tatou atunuu. E momoli atu le faafetai i le Afioga Komiti Faatonu lau Afioga Aiono Mereseine Siaosi Laulua ma le Komiti Faafoe lau Afioga i le Komesina Tanuvasa Oloapu Petone Mauga ma le mamalu i le pulega ma le aufaigaluega.
Faamalo le galulue ma le tauatai i lenei tausaga e le faagaloina foi le paia ma le mamalu o aiga ma uo ua aofia potopoto mai e molimauina lenei polokalame o le Kirisimasi mo lenei tausaga.
Lau Afioga i le Komesina ia alo maia
Manuia le faamoemoe ma ia faamanuia le Atua i le aofia.
Ma e faasilasila atu ua tatala aloaia nei ia faafiafiaga ma pesepesega o le Kirisimasi
Fa’afetai
Soifua
- Justice Alalatoa Rosella Papalii Receives Distinguished Alumni Award - October 11, 2026
- Samoa Wins Best Host Country Recognition at Miss Global - October 9, 2026
- ‘Ia Manumalo’: Signature Choir Releases New Anthem - October 9, 2026
