Sauni se tinā ua loa le tautua i le soifua maloloina e tauva i le faigapalota

0
839

 

E le’i itiiti se taimi na to manatu ai le afioga ia Mae’e Ualesi Falefa Silva e fia tauva mo sona avanoa i le Palemene o Samoa e ala i le faigapalota lea ua tapena atu iai le atunuu i le Aso 9 o Aperila o le tausaga fou.

I se fa’atalatalanoaga na saunoa ai Mae’e e fa’apea, o le faigapalota o le 2011 na fa’aosofia ai lona manatu e fia tauva mo le faigapalota, lea la ua sauni e fa’amavae aloa’ia mai lana galuega ua loa tausaga o tautua ai mo Samoa, ae tapena atu loa mo lenei fa’amoemoe taua.

O Mae’e o lo’o ua mae’a ona resitala i lalo o le fa’amalu a le Vaega Fa’aupufai o lo’o ta’ita’ia le faigamalo, le HRPP.

O le a sauni atu ia e tauva mo le nofo o le Itumalo ia Salega No.2 lea o loo umia nei e le sui tutoatasi, le Afioga ia Olo Afoa Fiti Va’ai. 

Na saunoa Mae’e, ua na’o ia le sui tama’ita’i lea o le a tauva mai ma Olo. 

Saunoa lenei tinā e fa’apea, ua ia tauva nei mo le HRPP aua o le tele o atina’e lelei ua mafai ona fa’atino e le HRPP. 

O le finagalo foi lea o le to’atele o nisi o lona itumalo lea na momolia o ia e resitala mo le HRPP i le vaiaso nei. 

O le talitonuga o Mae’e, e taua le leo o Tina ma Tama’ita’i i totonu o le Palemene o Samoa, aemaise o Tina e fa’amaopoopo i le tele o atina’e e mafai ona fa’aleleia ai nu’u ma afio’aga.

O le masina o Oketopa lea e fa’amae’a ai le konekarate a Mae’e o se Sui Ofisa Sili mo le Matagaluega o le Soifua Maloloina, ma ua atoa ai le 37 tausaga o tautua Mae’e i lenei matagaluega e pele ia te ia.

Saunoa Mae’e e taua ia te ia lenei galuega ona o le una’ia o puipuiga o le itu tau soifua maloloina o le mamalu o le atunu’u aemaise lava o le itu tau fa’ama’i le pipisi ma le tino puta.

“O lea ua o’o le taimi e litaea ai ae tu’u le avanoa i nisi o tagata o le atunu’u mo lenei auaunaga, ae atonu ua talafeagai lenei taimi e saili ai se avanoa mo le Palemene,” o le saunoaga lea a Mae’e.

O Mae’e na soifua mai le afio’aga o Vaipu’a i Savaii, ma na ia toe to manatu i le faigata o le soifuaga aua sa tua lava i le fa’ato’aga nai ona matua aua le fa’aa’o’ogaina o i latou.

O Mae’e sa faia’oga lona tua’a (Tama) ma na amataina mai ana a’oa’oga i le latou a’oga tulagalua i Vaipu’a ma fa’asolo mai ai i le Kolisi o Vaipouli ma Leva’ula.

O lana galuega muamua lava lea ina ua mae’a ana a’oa’oga i le vaega 13 o le Matagaluega o le Soifua Maloloina lea na maua ai ni avanoa mo ia e toe fa’alaua’itele ai le tomai i atunu’u mamao, ma maua ai ni fa’ailoga lea ua mafai ai ona maua nisi o tofiga maualuluga i totonu lava o le Matagaluega o Soifua Maloloina.

O Mae’e e to’alima ona alo ma o lo’o alala i le taimi nei i le afio’aga o Faleula.


Marieta H Ilalio