Ua talia e le Malo o Ausetalia le talosaga ina ia tuuina mai i Talalelei Pauga e tali i ona moliaga o le taupulepule lea e faaoo le oti i lē sa fai ma Palemia, faapea lē sa fai ma Komesina o Leoleo o Samoa.
O lenei talosaga ua fā tausaga talu ona taumafai atu i le Malo o Ausetalia. Ae o lea ua faatoa mafai ona tali mai e pei ona saunoa iai le afioga i le Loia Sili, Su’a Hellene Wallwork i se faatalanoaga ma lau Samoa Global News.
Saunoa le Loia Sili a Samoa, “Ua talia e le Malo o Ausetalia le talosaga na tuuina atu e faafoi mai ai Talalelei Pauga i Samoa e tali ona moliaga..
“O le taimi lava e maua mai ai le poloaiga aloaia mai le Ofisa o le Loia Sili a Ausetalia, ona malaga loa lea o Malu o le Malo mo le auina mai o Pauga.”
O Talalelei Pauga o le isi lea e atoa iai le toafā o i latou sa taupulepule e faaoo le oti ia Tuilaepa Sailele Malielegaoi, faapea Fuiavailiili Egon Keil.
O loo faamauina i molimau ua taliaina e Faamasinoga Maualuga, o Talalelei Pauga o loo tuuaia i lona faatupeina uma o fuafuaga, ma faatonuina mai taupulepulega mo le tagatavaleina o lē sa avea na Palemia o Samoa i tausaga e tele.
O Taualai Leiloa, 41, mai Magiagi ma Laulii o loo tuli nei lona faasalaga falepuipui mo le 5 tausaga sa tuuina mai e le Faamasino ia Tafaoimalo Tologata Leilani Tuala-Warren.
Ina ua tuuina atu lenei mataupu i luma o le Faamasinoga i le tausaga 2019, sa vave talia e Taualai ona moliaga. Sa ia faamatalaina i tali tusitusia gaioiga uma sa faatonu ai ia. O le molimau a Taualai i luma o le Faamasinoga, o Talalelei Pauga sa ia lafoina mai tupe ia te ia mai Ausetalia.
Sa molimau foi Taualai, na momoli atu ia te ia se laau malosi e faatino ai, faapea se taavale e na te fealuai ai, ma faatonu ia e alu e faatali i le malumalu katoliko i Siusega, faapea le maketi ia i Savalalo.
O le isi to’alua sa auai ai i le taupulega e faaoo le oti i le Palemia o Samoa, o loo tālia nei le lauina o ā lā faasalaga. O Malele Paulo ma Lema’i Sione, ua maea le faamasinoga sa faamaonia ai e le Vasega o Faatonu (Assessors) laua foi moliaga o le taupulepule e faaoo le oti.
O le 2019 na amata ai taumafaiga mo le aumaia o Talalelei Pauga i Samoa e tali ona moliaga, peitai, o lenei faatoa talia e le Malo o Ausetalia le talosaga.
