“O le a se malosi, o le a se iloa ma se mafai e gata ai, ou te fia tautua ai mo lo’u itumalo”.
O se faasoa mai lea a le fetalaiga ia Falesaopule Vaialia Iosua i se faatalatalanoaga ma le sui tauva, ina ua maea ona resitalaina aloia i le Ofisa o Faigapalota i le Aso Faraile 13 Me 2022.
O Falesaopule ua 43 tausaga o lona soifua. Ua silia ma le 20 tausaga o tautua i le Malo.
Sa galue i le Matagaluega o Aoga, sa galue foi i le Matagaluega o le Soifua Maloloina, atoa ai ma le silia i le 10 tausaga o galue i le Matagaluega o Tina ma Tamaitai, Nuu ma Agafesootai.
I le taimi nei o loo galue o ia i le Ofisa o Malo Aufaatasi poo le UNDP.
Saunoa Falesaopule, ua tasi Safune, e fai lona faatauvaa ma o latou suitauva mo le filifiliga o se tasi e tauaveina le nofoa o le itumalo i le Palemene o Samoa.
Sa ia saunoa, o Safune e aofia ai Fatuvalu, Faletagaloa ma Matavai.
“Ae ua tasi le Safune ia te a’u, e fai a’u ma o latou sui mo le faigapalota o loma nei i le aso 3 o Iuni”.
Saunoa Falesaopule, o ia o se matai tautua, matai tausi nuu, matai tausi aiga, matai fai monotaga..
Na fesiligia Falesaopule poo ia te ia se lagona faapolepole, aua o loo toalima i latou ua faamaonia o le a tauvāina nei le tofi.
Peitai, sa saunoa Falesaopule, e leai ma se popole ia te ia, pe manuia pe leai le palota, o le finagalo o Le Atua, tatou talia.
O ia o loo tapena fiafia lava mo le palota, ae e talitonu, ua uma ona tofi e Le Atua le sui o le itumalo.
“O ai lava e tula’i mai, o tofiga na mai Le Atua, pe manuia pe le manuia foi le faamoemoe, o le finagalo lava lenā o Le Atua, ma e tatau foi la ona tutu faatasi e ave le lagolago i lē o le ā tulai mai”.
O le ta tonu o le 12 i le aoauli o le Aso Faraile na tapunia ai le faauluina o suitauva mo le faigapalota laititi e pei ona faalauiloa e le Ofisa o Faigapalota.
E tapunia le avanoa, ua toalima sui ua aloaia ma talia e le Ofisa.
O le afioga is Sooalo Umi Feo Mene, ma Sooalo Poka, o tamalii mai le afioaga Samauga, lea o le a tauva i lalo o le fu’a a le vaega faaupufai o le HRPP.
O le tofa ia Foisala Lilo, o se suitauva tutoatasi mai le afioaga o Lefagaoalii, faapea le tofa ia Lomia Tiatia, mai Fatuvalu, o se sui o loo tauva mai i lalo o le fu’a a le FAST.
(198)
