Sauni le Faamavaega a le Peresitene o le Lakapi Liki ina ua Maea le 12 Tausaga o lana Tautua

0
1513

Ua faailoa e le Peresitene o le Lakapi Liki a Samoa, le afioga ia Tagaloa Faafouina Sua, o loo ia sauni atu e faamavae mai le tofi peresitene i le tausaga nei.

Ua 12 nei tausaga o uumia e Tagaloa le tofi Peresitene o le Lakapi Liki a Samoa.

Please Keep Samoa Beautiful and Clean.

I se faatalanoaga a lau Samoa Global News ma le afioga ia Tagaloa na ia saunoa ai, o le fonotaga faaletausaga (AGM) a le asosi o loo loma nei, lea ua sauni e tuuina aloaia atu ai lana faamavaega mai le tofi.

“O le ma’ea ai foi lea o le sueina o tusi ma faamaumauga tau tupe a le Lakapi Liki a Samoa.”

Saunoa Tagaloa o loo maualuga lona talitonuga ma lona faatuatuaga, o loo iai foi isi tamalii Samoa, e latou te tauaveina le tofiga ma toe laasia atu ai foi nisi laasaga mo le Lakapi Liki.

E tele nisi o matāti’a na mafai ona ausia e le Lakapi Liki a Samoa i lalo o le taitaiga a Tagaloa.

Sa mafai ona ausia e Samoa le suega siamupini (grand final) i le ipu a le lalolagi na sei mavae atu nei. O se taimi muamua foi lea i le tala faasolopito a Samoa ua oo atu ai se au a le atunuu i se grand final a le lalolagi.

O lea foi ua siitia Samoa i le tulaga 4 i le lalolagi. O se siitaga lea mai le tulaga 7 sa iai.

Saunoa Tagaloa, o se mitamitaga tele lea ia te ia, ma foi ai lava le viiga ma le faafetai i Le Atua ona o mea’alofa i alo ma fanau e pei ona iai taleni ua mafai ai ona latou avefu’a mo Samoa i lea foi faagatama o le lakapi liki.

O Tagaloa o ia o se suetusi iloga i totonu o Samoa, ma sa ia faatūina foi le Su’a & Associates o loo auauna i Samoa faapea Amerika Samoa.

I se toe tepa i le soifuaga tautua a le afioga ia Tagaloa Faafouina Sua, o le 1991 sa filifilia ai e avea ma kapeteni o le au lakapi liki a Samoa.

O le 2005 sa filifilia ai e avea ma Peresitene o le kalapu a Malisi (Marist St Joseph’s Sports Club) ae o le 2011 sa filifilia ai e avea ma Peresitene o le Lakapi Liki a Samoa, seia oo mai i le taimi nei.

Job Vacancies