Fesoasoani le Malo i Galuega Fa’aauau a le To’omaga auā le Fo’ia o le Sauaina o Tina ma Tamaita’i

Saunoaga a le afioga i le Minisita o Tupe i le sainiga o le maliega i le va o le Malo o Samoa ma le Faalapotopotoga o Toomaga mo Tagata Puapuagatia.

Aso To’ana’i, 02 Aperila 2022 . Ofisa o le Afioga i le Minisita o Tupe.

Taeao manuia.
E manatua pea ma le loto faafetai le alofa mutimutivale ole tatou Tapaau Sili i le Lagi i lenei taeao a o feagai ai si o tatou atunuu pele ma le pipisi ole fa’amai o le  Koviti-19. E saga viia ai pea lona Suafa ona ole mau faamanuiaga o loo liligi mai
pea mo Samoa. Aemaise o le momoli mai o lo outou soifua manuia ma se matou ola ua mafai ai ona faatinoina lenei faatasiga. Tatou faamoemoe pea ile mana o lana faamalologa ia Samoa atoa.

E talitonu o le a ou le toe autalaina le lavelave ole vao sa, aua o Paia o Samoa ua
taoto a o se alao’o, aua o mamalu ma paia e tumau.
Ou te fiafia tele e fa’afeiloai le Taitaifono o le Komiti Fa’atonu a le Toomaga mo  Tagata Puapuagatia, lau Afioga Georgina Lui fa’apea le pa’ia ma le mamalu o sui o le To’omaga ua tatou fa’atasi I lenei taeao.

O se aso mata’ina le asō aua o se taimi muamua lenei ua fa’amatu’u sa’o atu ai e le Malo o Samoa se fesoasoani e lagolago ai i galuega fa’aauau pea a le To’omaga aua le fo’ia o le sauaina o tina ma tamaita’i. O lenei lu’itau e le gata o se tasi o lu’itau o lo’o ave ai pea le fa’amuamua o le tele o fa’alapotopotoga faavaomalo a le lalolagi; ae o se faafitauli foi o loo aafia tele ai si o tatou atunuu.

E tele tausaga o lagolago pea e le Malo le tele o polokalame aua le fo’ia ma le taofia o le sauaina o tina ma tama’ita’i ae peita’i o le asō o le a fa’amausalīina ai.

le galulue so’oso’o tau’au ai ma le To’omaga aua se lumana’i saogalemu ma le manuia mo a tatou fanau aemaise o fanau teine;

E tusa ma le 46% o tama’ita’i i Samoa nei ua fa’amauina le sauāina o i latou e a latou pa’aga e aofia ai sauaga o le tino, sauaga feusua’i fa’a le mafaufau ma sauaga o lagona. O lenei fa’amaumauga o se tulaga fa’apopoleina ai le Malo ma ua amana’iaina ai le telē o le sao a le To’omaga mai ile tele o tausaga ua mavae i le taumafai lea e tu’uitiitia lenei fa’afitauli;

O lenei vaegatupe e $500,000 o le a fa’amatu’uina atu ile mae’a ai o lenei sainigalima e fa’amoemoe e lagolago ai i polokalame ma galuega a le To’omaga e aofia ai:

O le vaegatupe o le a fa’amatu’uina atu ile mae’a ai o lenei sainigalima e fa’amoemoe e lagolago ai i polokalame ma galuega a le To’omaga e aofia ai:

i. Fa’atalanoaina o ē ua sauāina ma a latou pa’aga;

ii. Polokalame fa’alea’oa’oga i nu’u ma alalafaga ma le atunu’u atoa e tu’uitiitia ai le ono alia’e o lenei fa’afitauli i totonu o aiga;

iii. Fesoasoani aua meaai taumafa aemaise tulaga mo’omia mo fuala’au ma isi aua le tausiaina o le soifua maloloina o ē o lo’o nonofo i apitaga sulufa’i a le To’omaga;

iv. Polokalame mo le si’itia o tamaoaiga ma alatupe mo aiga o ē ua sauāina e aofia ai le polokalame o le Nofotane ma isi;

v. Polokalame fa’alauiloa mo le atunu’u e aofia ai ma kolisi;

vi. Polokalame fesoasoani ai mo le fanau o lo’o fa’atau tausavali oloa ma isi ile taulaga o Apia (child vendors);

vii. Vaegatupe e fesoasoani ai i aufaigaluega ma le ofisa a le To’omaga ina ia mafai ona latou fa’atinoina polokalame ia lelei e pei ona ta’ua.

O le nauta’iga a le Malo tauala atu i lenei fesoasoani o lo’o ogatasi lelei ma le va’aiga taula’i o le Ta’iala mo le Lumana’i Manuia o Samoa 2021/22 – 2025/26 ina ia “Tausia le nofo fealofani, le saogalemu ma le sa’olotoga mo tagata uma” ma e fesoasoani fo’i ile ausia o le Ta’iala Autu Muamua o le Fa’aleleia o le Atina’ega o le Soifuaga Lautele; e faapitoa le ave ole fa’ataua ile:

– puipuiga ma le soifua manuia lautele o fanau, tamaitai ma tinā;

– faapea latou na a’afia i sauaga i totonu o aiga, ma i latou o loo lavevea

ile vaega o loo ma’ale’ale o latou siosiomaga (most vulnerable).

Avea lenei avanoa e fai ai au ma Sui ole Malo o Samoa e fa’afetaia ai le To’omaga mo lenei faiga fa’apa’aga aemaise ai le tele o galuega ma polokalame o lo’o ta’imua ai ma fa’atinoina e fesoasoani atu ai i e o loo puapuagatia ma fia maua se alofaga i o tatou nuu ma afioaga. Faafetai faapitoa i lau Afioga ile Peresitene, le Afioga ile Ta’ita’ifono ma le Komiti Fa’atonu, Pulega aemaise ai le aufaigaluega ma pa’aga uma a le To’omaga mo lo outou tautua lē faalogologotiga.

Faafetai foi i paaga a le tatou Malo o loo fesoasoani ma tuuina mai lo latou lagolago ia Samoa aemaise lava ile taumafaiga ina ia tafiesea le Sauaina o tina ma tamaita’i.

Ia fa’amanuia Le Atua i galuega uma a le To’omaga mo lenei tausaga aemaise ai si o tatou atunu’u pele.

Faafetai ma ia Manuia

(8)