Ua tuuina mai se poloaiga a le Faamasinoga Maualuga i le Ofisa o le Loia Sili e sa’ili se loia na te tau’aveina le mataupu o loo molia ai se alii na ia ave faamalosi se teinetiiti 15 tausaga, ma faatino iai sauaga matagā, mulimuli ane ua lafoa’i i le togāvao.
O Faataualofa Taefu, 44 tausaga mai Siufaga Falelatai, o loo tu’uaia i lenei mataupu ogaoga.
Ina ua toe valaau le mataupu i le Aso Gafua ma toe tulai ai Taefu i luma o le faamasinoga, ma na tā’ua ai e le Ofisa o le Loia Sili e gafa ma le mataupu, ua lē avanoa le tamaitai loia sa ia tulai mo le itu a leoleo (Prosecutor).
Peitai, na saunoa le afioga i le faamasino ia Fepuleai Ameperosa Roma, “afai ua lē avanoa le tamaitai loia sa ia tauavea le mataupu, saili se isi loia.”
O lenei mataupu sa suesueina mau i le masina o Me i luma o lana afioga i le Faamasino Sinia o le Faamasinoga Maualuga ia Vui Clearance Nelson.
O se tasi o molimau na ia ta’ua i luma o le faamasinoga, o Taefu sa ia ave faamalosi se tamaitai 15 tausaga ina ua oso atu lē ua aafia i lana taxi. Saunoa le molimau i luma o le faamasinoga, sa faainu i vai oona, ma faatino iai sauaga matagā tau feusuaiga. Sa oti le lauulu o lē ua aafia, ma lafoa’i i le togāvao.
O le tausaga ua mavae sa tulai mai ai lenei soligatulafono lea o loo tuuaia ai Taefu i le ave famaalosi i se taavale la’u pasese (taxi) se teineitiiti ina ua tū’ua mai le aoga.
Na molimau le tinā fai o lē ua aafia (stepmother) na le’i malolō le lā sailiga faatasi ma le tinā moni o si ana tama. O se tasi o ana uo sa ia matauina le numera o le taxi, lea sa maua ai fo’i ma le fale taavale taxi stand i Vaitele.
I le molimau a le tinā, na maua atu si ana tama o loo taoto mai i se togā manioka i se togāvao i Siusega. E faatū atu i luga ae e le’i mafai ona tū na o ia, ma ua oti fo’i lona lauulu. Sa faanatinati atu i le falemai i Motootua ma taofia ai lava mo togafitiga.
I le taimi nei o loo taofia lē ua aafia i lalo o le vaavaiga a le toomaga mo e puapuagatia le SVSG a’o faagasolo taualumaga o le Faamasinoga.
O lē o loo tuuaia sa malaga i galuega faavaitaimi i atunuu mamao ma toe taliu mai i Samoa nei. I le taimi na tupu ai le faalavelave, o loo fealuai Taefu i se taavale lau pasese laititi.
Ua faatulaga mai e le Faamasinoga le Aso 27 o Oketopa e toe valaau ai lenei mataupu.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
