I le feiloaiga masani a tusitala ma le Matagaluega o Leoleo i le vaiaso nei, na saunoa ai le Sui Komesina ia Papalii Monalisa Tiai-Keti, le tulai mai o le faatauina o fagu malosi i le ituaiga o lē o toe faatagaina i Samoa.
Avanoa Faigaluega
“Ua maitauina e le Matagaluega nisi o faleoloa o loo latou faatauina ava malosi ua lē o toe faatagaina e pei o le Rice Vodka ma isi..”
“O loo faagasolo i le taimi nei suesuega a le Matagaluega poo fea lea e sapalai mai ai nei ava malosi.”
O se itu na faailoa e le Sui Komesina e faateia ai le Matagaluega, ona o lea ua manino lava le faaiuga a le Komiti o Ava Malosi, e taofia ai le toe gaosiaina ma le toe faatauina o ia fagu.
“Ua taofia foi lona toe auina mai poo le faaulufaleina mai i totonu o Samoa, o soo se ava malosi e sui i le ituaiga vodka lava lea.”
Saunoa Papalii, e lē mafai ona lilo, e le mafai ona natia, ma ua ave foi le faamuamua a le Matagaluega e ala ia i latou ua gafa ma le suesueina o lenei mataupu.
O le tausaga talu ai ia Aperila 2022 na taofia tumau ai e le Komiti o Ava Malosi (Alcohol Control Board) le gaosiaina ma le toe faaulufaleina mai o soo se ava malosi i le ituaiga lea e iai le Boom Vodka, o le Rover ma isi.
O se suesuega a le Komiti na maua atu ai le tele o vailaau e aafia ai le soifua maloloina o tagata, ae maise o le methanol e tulai mai ai aafiaga o le mafaufau.
O aso fiafia na sei mavae atu nei, na saunoa manino ai Papalii, “Sa maitauina le faaititia o faalavelave ma soligatulafono tugā na tulai mai, talu ona aveese mai nei fagu ava malosi mai faleoloa i totonu o Samoa.
E mulimuli nei ona taofia nei fagu voka i le taisaga 2022, ae o le tausaga 2020 sa tuuina mai ai se fautuaga malosi a le tamaitai faamasino ia Tologata Tafaoimalo Leilani Tuala-Warren, ina ia silasila totoa le Komiti o Ava Malosi i le Rover, ona o le tele o soligatulafono ogaoga sa tuuina atu i ona luma, e tā’ua ai lava le Rover.
O nei fagu e leai ni pepa o faamatalaga poo le a tonu le pasene o le ava malosi, ae poo lea foi vaialaau eseese o loo tuuina atu i totonu o nei ava malosi.
(24)
