“Sa leai lava se faamoemoega e mafai ona toe faasaoina lo’u ola”

0
2160

Sa manatu lava Filipo Sosaiete, 32 tausaga mai le afioaga o Laulii, ua oo mai lava le maliu ma le oti, ina ua osofa’ia o ia e se puaa poo se mea tua’olo i se tasi po a’o aga’i atu o ia i uta i le mea o loo iai lona fale.

E ogaoga ni manuaga o Filipo, ma o loo taofia pea o ia i le falemai Tupua Tamasese Meaola (TTM) i Motootua, talu mai le Aso Faraile Aso 20 Ianuari lea s tupu ai le faavalevale.

E toatolu i latou sa taofia faatasi ma Filipo, o nai uso e toalua sa tamomoe ane e fesoasoani i ona puapuaga, ae lavevea uma ai i lā’ua. I le taimi nei ua tete’a i tua i la’ua ina ua ma’ea togafitiga ma ua faasolosolo manuia.

Peitai o loo taofia pea I le falemai i Motootua le susuga ia Filipo ona sa tele ni manuaga tuga o lona tino.

Sa fia faasoa mai lenei alii ona o le matautia o lenei faalavelave na tulai mai.

“O se lagona na ia te a’u, ua pei lava ua oo mai lava le maliu ma le oti.”

Saunoa Filipo, o ia sa savali i le auala e agai i uta i le latou fale poo.

“E tusa ma le te’a o le 12 i le vaveao, ae ou faalogoina loa leo o nisi o loo faapea mai,  vaai le puaa lena e agai atu i ou tua..”

“Ou te faasaga mai i tua ua toeitiiti lava oo atu ia te au..”

“Ua vave tele le oo mai o le puaa, ae ua leai se isi lava gaigoiga na ou mafaia e tetee atu ai..”

Hotel Elisa. Call +685.21116 or Visit www.hotelelisa.ws or Email: hotelelisa@samoa.ws

Sa osofai loa ia ona lā tauivi lea, ae ua mamulu ese ona lima sa mau i taliga o le puaa.  Ona sua lea o ia, ma ua sulu ai nifo o le puaa i ona vae, ma saei, se’i tulou.

Ua faapena foi ona ogavae, ua sulu ai foi nifo o le puaa.

Sa ia paū faō ona faapena foi lea ona sua lona pātua ma aafia ai lona nofoaga.

“Na tamomoe mai Tuivasa Mau ma Visesio e fia fesoasoani mai, ae ua faapena foi ona osofa’i e le puaa ma lavevea ai i laua.

O le toatele ifo o tagata i lena vaveao na mafai ai ona mate le puaa.

Na faanatinati i latou uma nei i le falemai i lena vaveao, ma faatino ai lava ni togafitiga.

O Filipo o se alii talavou o loo feagai ma le faiva tausi aiga ma nisi o ona uso e toatolu. O loo latou nonofo i uta, ma tausi si ona tina matua ia Serafi, ae ua maliu le tama ia Sosaiete.

Ua faafetaia e Filipo le alofa o le Atua ua maua ai le ola, ae na ia faailoa o lona manatu o ia lava ua leai se faamoemoega e faasaoina ai lona ola ona o le matautia o le mea tua’olō.

Sa tā’ua e Filipo, na ia maua le tala mai nisi o le latou nuu na iai i lea po ina ua mate le puaa, na latou fuaina le maualuga e tolu futu ma le ono inisi, poo le 106 cm le maualuga o le mea tua’olo na osofaia o ia.

Lynn’s Getaway Hotel Call: +685.20272 or visit our website: www.lynnsgetaway.com