“Sa fasi sesē a’u ma tatu’i o’u foliga i maa, ma tau’ai le matou fale””

0
8774

E 27 tausaga o se alii mai Leauvaa na faaoolima sesē iai nisi o taulelea mai Afega, toe tau’ai lo latou fale i maa.

I se faatalanoaga ma le susuga ia Maranata Simone, sa ia faasoa mai ai le mafatia sa oo iai lo latou aiga, ona e le gata o manuaga ogaoga sa oo ia te ia, ae sa tau’ai le fale o loo iai i totonu si o latou tinā matua.

Available now at SSAB

“E tolu masina le pepe a le matou aiga sa i totonu o le fale i le taimi sa tau’ai ai, faatasi ma si o’u tei e lima tausaga, ma si o matou tinā matua..”

O le molimau a Maranata Simone sa ia faamatala ma loimata maligi, o ia sa i luma o le latou fale ma matamata atu i le galuega a Afega o loo fai mai i luma o le aiga o loo latou faafesagai i le isi itu ala.

O le mago la sa tuu i lalo, na pa’u i luga o le fale a’o iai tamaiti i totonu o le fale i lea taimi.

O le laau sa pa’u i luga o le fale ao iai totonu tamaiti, sa mafua ai ona toatamai se tasi o Alii talavou.

O le molimau a Maranata, sa tali ifo se tasi o talavou 23 tausaga, ma ia lafo ifo upu masoa agai atu i ē o loo faatinoa le galuega.

Sa o ifo loa nisi o alii mai Afega ma tuli le alii lea sa ia lafoina upu i le galuega.

Sa agai mai lea tuliga ma kolosi le auala ma agai mai i le fale o Simone le tua’a o Maranata.

O le fale o Simone le tuaā o Maranata sa i le isi itu auala.

Ina ua latou le mauaina le talavou sa tuli mai, o ifo loa faaoolima ia Maranata.

O se maa sa latou faaaogaina e tatu’i ai ona foliga. Sa aafia ai foi le toalua o Maranata ina ua ia taumafai e pupuni ma sefe si ona toalua.

O le fale a le aiga o Maranata Simone

O le molimau a Sapati, le uso o Maranata, o le taimi lava lea na fasi ai Maranata, ae o le la foi e tauai e isi le fale i maa, ao i totonu le tina matua ma tamaiti.

O le molimau a Sapati, e tupu le faalavelave o loo iai leoleo e toafā.

Sa ia faailoa lona faanoanoa, ona o lana mau, e leai se gaioiga na faia e Malu o le Malo.

Sa alu ane Sapati ma ia talanoa i Malu o le Malo, “E tatau ona fai lo outou tiute, o lea ua manu’a lou uso ma toe tauai ma le matou fale..”

Ae peitai o le mau a Sapati, e leai se tala a Malu o le Malo.

“Ae na o le tasi o leoleo na ia tago aumai le $25 tala e fesoasoani e ave ai lo’u uso i le falemai.”

O le o ese o Afega mai luma o le latou fale na latou faanatinati ai loa i le falemai e ave lona uso ona sa maligi le toto i foliga ona o le maa sa fa’aaoga.

E le’i mafai ona talanoa mai le tina matua ae na o le maligi o loimata ao talanoa mai le fanau.

O le Aso Faraile o le vaiaso na tea lea sa tupu ai lenei faalavelave.

O loo tālia se tali mai leoleo poo iai se suesuega o loo faatino e ono molia ai nisi sa faaoolima ia Maranata.

E lei maua se fesootaiga ma Maulolo i se tali mai a Afega e uiga i mau o loo tuuina mai e le aiga sa aafia.

Avanoa Faigaluega