O le Aso Tofi o le vaiaso na tea nei sa tulai mai ai se faalavelave matuiā i le afioaga o Siumu ina ua faaaoga e se atalii 25 tausaga le matua, se laau malosi e faaoo ai le maliu i lona lava uncle, le tuagane o lona tinā.
E toalua uncles o Sunia Lino sa ia agai atu e sue i lea po. Sa faasaoina le isi, ae maliu ai le toatasi, o le tamā ia Iakopo Seinafo, 37 tausaga le matua.
E lua pulufaga sa alu Sunia aumai mai se tasi o toeaiina o le nuu, ma lana faamatalaga, na te moomiaina e faga ai ana puaa, sei tulou.
O ripoti a molimau o lenei mataupu, na taunuu atu lē ua molia, o loo nofonofo mai le ua maliu i se nofoa i le tulimanu o le faletele. Sa ia tai le laau malosi pulu tasi, “ma faga sa’o lava lona ulu i le itu agavale..”
Sa faia se inuga a Sunia ma lona uso i Maninoa, Siumu. O loo masalomia sa aafia ai fo’i ni fualaau faasaina.
Ina ua maea, na la savavali mai ai loa e agai i le latou fale i gauta, ma ki faaleotele i luga le leo o le la speaker.
Ina ua pasi ane i luma o le fale o le la grandmother, ae valaau ane loa iai lo la uncle ia Iakopo Seinafo i le leo o le la speaker.
O le faamatalaga a molimau, e faapea sa palauvale ane Sunia i lona uncle.
Sa valaau loa e Iakopo i lana telefoni, i le isi ona uso lea e nonofo faatasi ma Sunia, ma ia faaali iai le mea sa tupu.
Ina ua taunuu atu Sunia ma lona uso i uta, sa faasaga ane loa le uso lea o Iakopo sa ia fesootai iai, ma fasi loa Sunia ona o uiga le mafaufau sa ia faia ia Iakopo.
I se tali atu i le fasiga o ia, na ave ifo loa e Sunia se laau malosi sa i totonu o le latou fale, ma toe fo’i ane i tai i le fale o Iakopo.
Na faateia le aiga i le matautia o lenei faalavelave. Ae maise, na savali atu lava Sunia o loo nofo mai si ona uncle i le nofoa i le tulimanu o le faletele.
“Sa faga sa’o lava lona ulu I le itu agavale..”
Sa agai foi Sunia i lona uncle lea sa fasia ia. Peitai sa faasaoina lena po le isi uncle, ina ua feei atu (sei tulou) nisi o le aiga.
Ina ua mae’a gaioiga uma nei a le ua molia, sa ia alu ane ma faailoa atu i ona matua, aga’i loa i tai e vaai Iakopo lea ua mae’a ona ia faaoo iai le maliu.
Na faamaonia mai e le Sui Komesina o Leoleo ia Leiataua Samuelu Afamasaga i le Samoa Global News, ua molia Sunia Lino i moliaga o le fasioti tagata faamoemoeina ma le uumia o se aupega matautia.
E lei maua mai se faamaoniga, pe sa suesueina le ua molia i ni aafiaga o fualaau faasaina.
Avanoa Faigaluega!
