Na faapu’upu’u e leoleo le solaaga a alii pagota e toalua lea na o ese mai i le falepuipui i le Aso Sa ua mavae nei.
O le afiafi ananafi na faasalavei ai e leoleo se taavale sa malaga mai ai lea aualii.
Sa tuuina mai se faamatalaga e se tasi o alii sa pagota muamua, sa fesootai atu i leoleo ina ua maea ai ona vili atu le alii o Lauitiiti e piki laua ma Aniseko. O lea alii pagota sa taofia faatasi ma le alii o Lauititi i le potu e tasi ae lei tatala mai i tua i le palola.
Sa fai tonu loa leoleo ma le pagota palola lea, e alu pea e piki mai, ona latou taofia lea o le taavale.
Sa taofi e leoleo le taavale laititi paepae sa omai ai pagota i luma o le kamupani o le Taula i Falelauniu lava.
Sa taua e le Alii Komesina o Leoleo Su’a Fuiavailiili Egon Keil e faapea sa latou mauaina foi o loo umia e pagota sosola ni mariuana.
E leo toe po se lilo i le atunuu, le matuia o solitulafono o loo falepuipui ai i laua nei.
Sa saunoa le Alii Palemia e faapea o le faatamalaina o faitotoa o le falepuipui e se tasi o le au faigaluega i Tanumalala ua mafua ai ona sosola ia pagota. O loo ua faase’etuagalu fo’i le Komesina o le Falepuipui ona o le mataupu lava lenei.
O le faafetai e agai tonu i le matagaluega o leoleo i lo latou mataala, faapea foi le fesoasoani a le vaega o le falepuipui. Na faaalia talu ona sosola i laua nei ua toe maua, sa amata mai ai ona tolauapi nisi o vaega o le matagaluega o leoleo aua lava le sailia o le aualii ia.
O loo taofia pea la i laua nei i le taimi nei i le ofisa o Leoleo i Apia.
(0)
