Galulue le Toomaga ma Aumaga i Polokalame e Tafiesea ai Sauaga Faaasaga i Tina ma Tamaitai

A’o fa’agasolo ai le fa’atinoina o le Polokalame a le To’omaga e lagolagoina ai taumafaiga a le Malō mo le tafiesea o sauaga fa’asaga i tina ma tamaitai, na maoa’e le talisapaia e taulelea mai aumaga e lima ua filifilia mo lenei faamoemoe.

Na maitauina lea i se fa’atalatalanoaga i lenei vaiaso a le To’omaga, ma sui o aumaga filifilia, e faailoa i ai le Polokalame ma le matafaioi ua tu’uina i aumaga latou te fa’atinoina.

O le sao taua a aumaga i le Poloketi, o le fa’amaite lea o ni atinae i totonu lava o ō latou afioaga, e fesoasoani i le mativa ma le lē tagolima. A’o se avanoa taua foi e fa’aaupegaina ai i latou aua lo latou tautua tuavae i le fale o matai, aiga ma afioaga.

Na taua e se tasi o tamalii mai le afioaga o Pata Falelatai, o Aulele Fasi, “O le lagona fa’afetai ma le fa’agaeetia o le agaga, ona ua amanaia le itupa o Aumaga i lenei Polokalame taua. Aua e moni lava i le tele o Polokalame ma faamanuiaga, e mafuli lava i le taitaiga a matai. Ae peitai, o lea ua agai tonu lava lenei vaega taua o le Polokalame i Aumaga, aua lava le saili fofo i le tafiesea o sauaga fa’asaga i tinā ma tamaitai.”

Na lagolagoina e le sa’o aumaga mai Lona Fagaloa, o Ariu Lisi, atinae mo taulelea i lalo o lenei Polokalame.

“E le faigofie le tautua tuavae a le aumaga aua le saofaiga a tamalii.  A’o se tautua e fai ma le loto aua o lo matou lea matafaioi. Ae o le faafetai i le Polokalame, o le amanaia o aumaga, ma lo latou foi sao taua i le tafiesea o sauaga fa’asaga i tina ma tamaitai, e ala i le atinaeina o le tamaoaiga o nuu ma afioaga.”

E toalima aumaga mai afioaga o Taga ma Iva i Savaii; fa’apea Gagaifo Lefaga, Lona Fagaloa ma Pata Falelatai i Upolu, ua filifilia mo lenei polokalame.

Ua mataituina e le To’omaga le ausia ai o fa’amoemoega, mo le siitia o le tamaoaiga, fa’aititia le mativa ma le le tagolima, aemaise le tafiesea o sauaga fa’asaga i tinā ma tamaitai pe a galulue ma aumaga.

“E fa’amauina le agaga fa’afetai a le To’omaga mo e Puapuagatia i nai o tatou aiga, sui auai, faapea tulafale, ona o le tumau pea o le tou loto tetele, e tauave fa’atasi le tatou galuega.  Manatua, o la outou tautua tuavae, e malu ai a outou feagaiga.” Siliniu Lina Chang, Peresetene o le Toomaga.

(6)