Poloaiga Ua Faamalosia e Tusa ma le Vaega 106 o le Faavae o Samoa

0
687

FAASILASILAGA: FAAMAI PIPISI O LE MISELA

Poloaiga mo Faalavelave Tutupu Faafuasei

OFISA O LE SO’OUPU; I le maea ai ona faamalieina tutu’uga ole Faavae o le Malo o Samoa ua alagatatau ai ona tuuina atu poloaiga ua taua i lalo mo faalavelave tutupu faafuasei, ao iai le atunuu i le vaitau o le Faaaliga Faasalalau o Faalavelave Tutupu Faafuasei, e tusa ma aiaiga o le Vaega 106 o le Faavae o le Malo Tutoatasi o Samoa.
O le aotelega lenei o lea poloaiga;

i. le faia o le Poloaiga (Order) ina ia faamalosia (compulsory) ai le faia o tui puipui mo le misela mo i latou uma e le’i faia ni tui puipui i Samoa;
ii. le faatonuina o le Matagaluega o le Soifua Maloloia ina ia vave faamautu loa le polokalame mo lenei tūiga mo le atunuu atoa, ma ia faailoa faalaua’itele i le atunuu i le Aso Gafua 18 Novema 2019 lenei polokalame. Ia aofia i lenei polokalame vaega ua taua i lalo;
1. nofoaga e fai ai tuiga;
2. aso ma taimi mo nei tūiga;
3. auala e fela’ua’i ai le atunuu e agai atu ai i nei nofoaga (pe afai e talafeagai);
4. tausaga faatapula’a (age group) o le a faamuamua ona tuI;
5. nisi faatonuga talafeagai mo le puipuiga o le atunuu lautele ao faatino nei tūiga;
iii. le faamalosia (compulsory) o le tapunia loa o aoga uma i Samoa (e aofia ai aoga a le Malo, Iunivesite Aoao o Samoa (NUS), Aoga Ekalesia, Aoga Tumaoti) e afua atu i le aso e faamaonia ai nei poloaiga, atoa ai ma le toloina i tua (postpone) o suega uma a le fanau o loo fai nei, seia toe maua atu se isi faatonuga mai le Malo;

iv. le taofia ona toe auai le fanau, mai pepe e oo atu i le 17 tausaga le matutua i ni faatasiga toatele (public gatherings), seia toe tuuina atu se isi faaaliga;
v. le faamalosia (compulsory) o le toatasi (1) o le tausima’i (caregiver) e tausia se gasegase o loo taofia i soo se falema’i i le atunuu;
vi. e tapu ona ave, pe auina le fanau iti e oo atu i le 18 tausaga le matutua i totonu o falema’i, sei vagana ai e fia vaai se fomai;
vii. le faatonuina o le Matagaluega o Leoleo ina ia faatino le latou galuega mo le puipuiga o le saogalemu i Falema’i, aemaise lava i le Falema’i tele i Motootua, e mata’itu tagata e soona asiasi atu iai, ma ia galulue faatasi ma le Matagaluega o le Soifua Maloloina;
viii. le faaauau pea o galuega uma a le Malo sei vagana ua iai se isi poloaiga e tuuina atu.

O lenei poloaiga ua faamaonia ma sainia e le Sui o le Fono a Sui Tofia, le afioga Le Mamea Lemalu Su’a Tuiletufuga Leatuavao Ropati Mualia e fai ma Sui ole Afioga I le Ao o le Malo oloo toesea ma ile maea ai foi o feutagaiga ma fautuga a le Kapeneta.