Tusia: Pesetā Tusiga Taofiga, Govt Press Secretariat. Ua pāsia aloā’ia e le Kapeneta, e pei ona fofogaina e le afioga i le Palemia, Susuga i le La’aulialemalietoa Leuatea Polāta’ivao Fosi Schmidt, le $18.5 Miliona o le Fesoasoani mo ā’oga uma i Samoa [One Government Grant – O.G.G.] e pei ona masani ai i tausaga ta’itasi.
O lenei fesoasoani, e aofia ai ā’oga uma a le Mālō, o ā’oga a ekalesia ma ā’oga tumā’oti, ma o le ā ta’imua ai le Matāgaluega o Ā’oga ma Aganu’u fa’atasi ai ma Fono Fa’avae.
E i ai lava ā’oga o le ā fa’amatu’u sa’o i ai seleni, e lē ui atu i Fono Fa’avae ona o aiaiga ma mafua’aga tāua i le natura o le latou auaunaga.
O le naunauta’iga o le Mālō, ia unā’ia fanau e aga’i i ā’oga, auā so latou lumana’i manuia.
E i ai Komiti o Ā’oga i le tele o ā’oga, ua fa’ailoa manino e La’aulialemalietoa, o le ā i lalo uma o le fa’amalumaluga a Fono Fa’avae i latou nei, fa’atasi ai ma Puleā’oga, i le va fa’afeagai ai mo le fa’asoaina atu o lea seleni auā fanau.
E lē fautuaina e le Mālō le faia o ni lesitala po’o ni sa’iligātupe e pei ona taulāmua ai Komiti o Ā’oga i tausaga ta’itasi, auā o le ā fa’alēāoga ai le agaga moni na afua ai ona finau le Mālō e fa’aā’o’oga fua uma fanau.
E le’o fautuaina fo’i e le Mālō, le faia o ni saogāmea i meaai mo ni fafaga i aso o faiā’oga po’o se isi lava fa’amoemoe o le ā’oga, auā o le isi lea vaivaiga e tuli tagata tele, ma atili lē naunau ai mātua e ‘ave ā latou fanau i le ā’oga.
O lo’o fa’agasolo le fa’ata’otoina o Faiga Fa’avae uma a le Mālō, i le fa’atulagaina o le fafaga fuaina o fanau i ā’oga uma.
E le gata i lea, ae o le toe fa’a’opoopoina o ā’oga amata i le atunu’u, o se fa’avae papa, e fa’atonu folau ai le ola a’oa’oina o fanau mai lava i le mu’amu’a se’ia o’o ina fa’au’uina i ā’oga mauāluluga.
O le Matāgaluega o Ā’oga ma Aganu’u [M.E.C.] o le ā fa’asafuaina lea seleni e tusa ma Ta’iala ua fa’atulagaina, ona fa’asoa atu lea i Ofisa o Fono Fa’avae mo le va fa’afeagai ai ma ā’oga ta’itasi i totonu o Itumālō ‘ese’ese i le atunu’u.
O lenei seleni e vaevaeina i luga o le fuainumera o fanau aoga poo le lola a aoga taitasi.
O le polokalame fesoasoani tau seleni a le Malo mo aoga uma a le atunuu sa amata aloaia i le tausaga e 2010 lea sa faatupe ai e le Malo o Niu Sila ma Ausetalia lea sa faaigoaina i lena vaitau o le Fesoasoani mo pili aoga a fanau poo le Samoa School Fees Grant Scheme.
Peitai o le tausaga e 2018 sa faasee ane ai le polokalame e faaauau e le Malo o Samoa.
O le tausaga e 2019 sa suia ai le igoa i le One Government Grant.
Don’t Miss these February Specials
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
