Pasi Fou mo Falealupo mai le Poloketi Miliona

0
544

Tusia: Tusiga Taofiga

E $155,000 le tau atoa o le pasi sa fa’atauina mai le ASCO Motors e le Itumālō o Falealupo e fa’aāoga ai se vaegātupe o le latou $1 miliona mai le Mālō.

I se faatalanoaga ma le Faipule o le Itumālō iā Fuiono Tenina Crichton, na ia saunoa ai, “Ua tali mana’oga o le Itumālō, auā fanau ‘āoga mo feoā’iga i a’oa’oga i aso ta’itasi, ma sefe mai ai i le lavevea i ta’avale pe a savavali i le auala tele e aga’i i ‘āoga o lea aso ma lea aso.”

Sa ia fa’afetaia le tōfā mamao ma le uta fetāla’i i le Faigāmālō ua tu i le foe, ua afua ai ona tali se tasi o miti ua leva ona mo’omo’o i ai Falealupo.

O lea pasi e tasi, ua fa’atauina ma le fa’amoemoe e fe’avea’i ai fanau i ‘āoga ma toe piki pe a tu’ua, fa’atasi ai ma nisi vaega e fia malaga ai le paia o le afio’aga.

Fa’ailoa manino e Fuiono, e lē mafai ona fa’aāoga lea pasi e fe’avea’i ai ni pasese i le va o Falealupo ma Salelologa.

O le fiafiaga i le Faipule, ona o le faigofie o feoā’iga mo fanau, ina ia tu’uitiitia ai le popole o mātua pe a usu fanau i ‘āoga.

O le fuafuaga a le Itumālō, e fa’atali tasi le pasi i le nofoaga ua atofa, ona malaga fa’alua lea o le pasi e momoli fanau i a’oa’oga, ma e ta’i $1 i le pasese a le tamaitiiti e to’atasi.

O le seleni o le a maua mai pasese nei a fanau, o le a fa’aputuputu e fa’aāoga mo le penisini o le pasi auā lana galuega faifaipea o aso uma.

Saunoa Fuiono, afai ae fa’aletonu se vaega o le pasi, o le a gafa lava le Itumālō o Falealupo ma le seleni e fa’atupe ai lona toe fa’aleleiga.

O le ta’utinoga a Fuiono, e lē itiiti lona fa’afetai i le tāua ma le āoga o lea polōketi lelei a le Mālō, ua manuia ai afio’aga ta’itasi ma tali ai mana’oga o Itumālō i atina’e ua leva ona mo’omo’o ina ia fa’atino.

O lea pasi o se pasi fou i le itu’āiga o le Toyota Coaster Bus 4.2L e sui kia ma o le tausaga e 2023.


Tusiga Taofiga