“Ou te faamalulu atu Samoa i lau tapuaiga” – Faatoese le Sui Faipule o Vaimauga I

0
8055

I se faatalatalanoaga ma le afioga Sulamanaia Tauiliili Tuivasa, na ia saunoa ai e faamalulu i le mamalu o Samoa, ona o feeseeseaiga sa tulai mai i totonu o le Palemene, lea sa faatulai ese ai lona Sui Faipule mo se aso e tasi.

 

File photo: Sulamanaia in Parliament. Photo: Palemene o Samoa.

“Ou te faamalulu atu Samoa i lau tapuaiga, ona o se tu foi ma se aga, ao se faamatalaga foi na outou faafofoga iai i le aso ananafi. Ou te faatoese atu, ou te faamaualalo atu, Samoa faamagalo mai..”

“O a’u e tumu i le faaaloalo, peitai, ua le mafai foi ona ta’ofiofi foi le ita i le aso ananafi, ona o sa’u maitau, o lea ua leai se aoga o le faaleleiga sa fai, ae o lea ua taui ma sui..”

Ua saunoa Sulamanaia, o le isi itu sa faanoanoa ai, ua leai lava se faa’aloalo o sui ia na fetaua’i – ae sa tatau ona faa’aloalo uma i le tuualalo mai ma le saunoaga a le Fofoga o le Fono, le afioga ia Papalii Lio Taeu Masepau.

“E pei o le mafuaaga lena sa ou valaau ai loa, “Omai e pigi totonu ii.. O la’u tala sa valaau ia Laauli ma Leala, ona ua leva tele tausaga o fai pea lenei va.”

Saunoa Sulamanaia, o le aso ananafi ua mavae atu, ma ua uma ai foi. E le o iai se mea e le o fiafia ai.

“Lea na silasila lava ma faafofoga iai, sa ou toe faamaualalo lava ma toe faatoese i luma o le Palemene ae ou te lei tuua le Maota Fono. Ou te faaaloalo tele i le Fofoga o le Fono, ma sui uma o le Palemene,”

Saunoa foi Sulamanaia, o fonotagaa a le Palemene, e pei lava o fono a matai i tua i afioaga.  “Poo a lava feeseeseaiga, o laloifi lava, e gata ai lava iina. E uma foi toe talie ma toe faalelei ma fai mea fiafia.”

“O lea foi faatoa ou sau mai le fonotaga a le Komiti Faalepalemene, lea sa ou auai atu iai”.

O le afioga ia Sulamanaia Tauiliili Tuivasa, sa mua’i filifilia mai e lona itumalo i Vaimauga 1  i le e palota tele o le 2016, ma toe tofia ai foi i le palota tele o le 2021.