O se aso ua leva ona moe miti iai le Paia o le Ekalesia EFKS i Apia, e feiloai ai ma le latou faifeau fou ma osi ai le latou feagaiga ma le Susuga ia Rev Dr. Latu Latai ma le faletua ia Lotu.
Sa tomua lena aso faapitoa i se sauniga lotu na faatino i le malumalu o le Ekalesia lava i Apia, ona see atu lea o le mamalu o le aofia i le nofoaga o loo iai le maota o le galuega mo le taumafataga ma faa’aloaloga masani aua i latou na afifio ma auai ai, ae maise le vasega o le au Sā Levī.
I le ma’ea ai o faaaloaloga masani ona tuumuli lea o le paia o le aufaigaluega totofi a Le Atua i soo se fata faitaulaga, faapea uo ma e mamae, ae feiloai loa lea le Ekalesia ma le Paia o Aiga-na-lua.
O le Afioga ia Le Mamea Ropati, o le Sui o le Fono o Sui Tofia, o le taitai fono foi a le Ekalesia i Apia, na tulai ma fai ma fofoga o le Ekalesia. O le tofā ia Masinalupe Tusipa sa fai ma fofoga o aiga-na-lua.
Na tulaga ese le maualuga o faa’aloaloga e pei ona faasopolia uma ai le paia ma le mamalu o le Ekalesia, e pei o faatamalii, o tofā, o teutusi, ma faaoso. E oo lava i matafale taitasi, sa tofu uma matafale e 47 ma le ie o le malo, (tofā) ma le meaalofa e ta’i $500 tala. O faaaloaloga a le susuga i le Taitaifono ia Le Mamea Ropati faapea le faifeau sa tausia Apia e tai $2000 tala.
Peitai na maeu foi le tali mai a le Ekalesia. Na faatino foi e le Ekalesia faatamalii o aiga e lua, o pasese e ta’i $10,000, faapea foi faa’aloaloga i lupe faalele o aiga-na-lua. Sa taualuga faa’aloaloga i le momoli o le faaoso o aiga-na-lua e $50,000.
Saunoa le aao tusitusi o le Ekalesia le Afioga ia Teo Taito Afamasaga e faapea, o le latou Ekalesia sa taitaia e le susuga i le faafeagaiga ia Rev. Utufua Naseri mo ni tausaga se tele. O lea ua penisiona malolo manumalo.
I le vaitau sa sailia ai se finagalo o le Ekalesia mo se faifeau fou, na vaaia ai e le Susuga ia Apelu Lelevaga ma lona Faletua le latou Ekalesia mo le lua tausaga. O le susuga ia Apelu o se a’oa’o ua ma’ea ona faauuina mai Malua, o se matafale foi o Ekalesia i Apia.
“O lea ua filifilia ai loa e le Ekalesia le susuga ia Latu Latai ma le faletua ia Lotu, e fai ma faafeagaiga a le Ekalesia i Apia nei”.
Sa vaaia le matagofie o le faasologa o polokalame uma o le aso, ae maise o le sagisagi fiafia o sui uma o le Ekalesia mai lava i ulumatafale seia oo atu i le autalavou, auā le faatinoina o tulaga uma o le aso.
Sa faaiu i se taualuga na vaaia ai le saasaa fiafia o le mamalu o le Ekalesia faapea sui uma o aiga-na-lua.
Sa maua se avanoa e faatalatalanoa ai le Susuga i le faifeau ma le faletua ina ua maea le polokalame i le afiafi o le Aso Toanai. Sa momoli le faafetai i Le Atua ina ua iu ma le manuia le faamoemoe.
Sa faamauina le loto faagaeetia o le Susuga i le faifeau ma le faletua i le paia o le Ekalesia i Apia, lea ua fai ma o la nuu.
“O le faafetai i Le Atua ona o le malosi ma le ola o loo ia foai mai pea i lea aso ma lea aso;
“Faafetai foi i le Paia o le Ekalesia i lo latou filifilia ma’ua tagata faatauvaa e vaaia le Ekalesia. Ia e faamoemoe lava i Le Atua na te faatonuina mai o tatou tagata le atoaatoa, aua o ia e atoa ai mea uma.”
O le 1992 agai le 1999 sa faiaoga ai le Susuga ia Latu Latai i le kolisi i Avele. O le tausaga e 2000 na ulufale ai i le kolisi faafaifeau i Malua. O le tausaga 2005 na faaipoipo ai, ae o le 2006 na i’u mai ai i Malua.
Sa galulue faa-faiaoga i le Kolisi i Malua ina ua iu i le 2006, seia oo mai i le masina o Iulai 2021. Sa auai atu foi le Susuga ia Latu mo aoaoga maualuga ma ia ausia ai foi le PhD poo le doctorate i mataupu silisili lava o le Tusi Paia.
E tai 50 tausaga le soifua o le faafeagaiga ma lona faletua. O Rev Dr Latu e sau mai Saleimoa, ae o le faletua ia Lotu e sau mai Apolima, ae sa soifua lava i Ueligitone, Aotearoa. O le faletua ia Lotu sa faigaluega o ia i le Computer Services Ltd faapea le Ofisa o le Regulator.
E toalua nai a la alo; e matua le teine e valu tausaga, sosoo ai le tama e tolu tausaga.
(18)
