Ua tuuina mai se faasalaga i le falepuipui o se tamā na maliu ai se alii talavou ae manunu’a ai nisi alii se toalua sa tafafao i se matafaga i Tafatafa Falealili.
O Nu’uuli Lopesi, 51 tausaga o Tafatafa, ua faasala nei i le falepuipui mo le 6 tausaga, i se faalavelave na tulai mai ia Mati o le tausaga ua mavae.
O le faalavelave nei, o se tafaoga a ni alii talavou se toatolu mai Lotofaga i Aleipata ma se tamaitai e toatasi mai Salani Falealili. Sa tafafao i se matafaga i Tafatafa i le Aso Sa.
I taualumaga o lenei mataupu e faapea sa tagofia e i latou nei le ava malosi. Sa pisapisaō ai i lea Aso Sa, pe tusa o le te’a o le itula e 3 i le afiafi na latou tuua ai lea nofoaga.
Peitai ane, na tali ifo nisi o le afioaga i ni maa ma tauai ai le taavale a ē na aafia.
O lea na tulai mai ai le faalavelave, Ina ua tali ifo foi latou nei e toatolu i le tauaiga maa atoa ma le faaumuumu ma lalafo upu masoa.
Na agai ifo lē ua molia ma le sapelu ma faaoo ai loa le manu’a i lē sa maliu. Sa manunu’a tigaina ai foi le isi toalua.
O le tala a fomai ina ua tulai mai lenei faalavelave, e matuiā tele manuaga i le ua o lē sa maliu, ma na toeititi ai lava motu ese sei tulou.
E fa moliaga a le itu a leoleo na ioeina uma e Nuu’uli, e aofia ai le fasioti tagata paivalea (manslaughter), lua moliaga o le faaoo o manuaga tuga (grevious bodily harm) ma le umia o se auupega matautia (armed with dangerous weapon).
Ae i le tolaulauina o le faaiuga e le Alii Faamasino le afioga ia Fepuleai Ameperosa Roma, sa ia faapea mai ai, “Ua silasila le faamasinoga i le itu o le amata mea lea o talavou i le pisapisaō i le Aso Sa, atoa ai ma le umia e lē ua molia nei o se aupega matautia.”
“Ua silasila foi o lea ua maea ona faatino le ifoga, lea na momoli ai le $10,000 i le afioaga, o tofa ma lafo, lea na faa’alu ai le $5,000, aemaise o le $10,000 na tuuina atu mo le lauava, o itu lelei ia,”
“Ua taunuu ai le faamasinoga i lana faaiuga, o le moliaga o le fasioti tagata paivalea ua faamaonia, e valu tausaga. O le lua moliaga o le faaoo manu’a tuga, e ta’i tolu tausaga i le moliaga e tasi. O le umia o se aupega matautia e iva masina le faasalaga.”
Ina ua toesea mai nisi o masina mo itu lelei e pei o le ifoga, o seleni sa faaaluina mo le afioaga, o le lauava, faapea le vave ioeina o moliaga, sa totoe mai ai le ono tausaga e nofo sala ai i le toese i Tanumalala.
(3289)
