“O a’u taumafaiga, o la’u meaalofa lea mo nai o’u matua.”
O Lizma Ramona Iloilo, e sau mai se aiga e na o le toalua laua le fanau. O ia ma lona tuagane, ma nai a la matua.

O si ona tamā o Siitagata Filipo Iloilo, o loo tautua o ia o se Malu o le Malo faapea lona tina ia Tapaautasi Ruby Puni Iloilo.
O Lizma, 24, mai Lalovaea, Lotofaga ma Samatau, na ia maua le faailoga o le sili aoao (dux) i le Aoga Matata Eeese o le Tesese Institute.
Faasoa mai Lizma, e tele luitau sa fetaia’i ma ia.
O le tulaga tau le seleni faapea le tau faasoasoaina o le taimime tauave ai tiute o le galuega, ma se taimi faaavanoa e fai ai ana mea’aoga.
“O se itu e lagona ai le tau faavaivai i nisi o taimi, peitai, o le faamalosi ma le vaai atu i le naunau mai o nai o’u matua, sa fai lea ma fafagu i lo’u olaga finau..”
“O a’u taumafaiga, o se meaalofa sili lea mo i laua.”

O Lizma, sa tulaga muamua i mataupu faaofisa (Office Administration), tulaga muamua i le mataupu o le Software, ma toe tulaga muamua i le mataupu o le Word Processing.
O Lizma Iloilo, o loo faigaluega nei i le Rimana Accounting Firm i Vaivase Tai.
Na ulufale o ia i le Tesese i le tausaga talu ai, 2023.
Sa momoli ma ia aimaia se tuualalo mo fanau aoga, “O le aoga o le ki lea mo lou lumana’i manuia, ia finau ae aua le faavaivai.”
I le faauuga i le aso ananafi i le maota o tupulaga a le EFKS i Sogi, e 68 le aofai o le vasega fa’auu, peitai, sa le mafai ona auai se tasi o le vasega.
O Aso Lulu o le vaiaso ua mavae ao tapena atu mo le faauga, sa faia ai toe sauniga o se tasi o le vasega fa’auu. O Faamanu Kaisa, na maliu faafuasei o ia i se gasegase. Sa mafai ona oo atu lona tuafafine e tauaaoina lana faailoga.
E tele alo ma fanau sa aotauina i le Tesese ua maua galuega i pisinisi ma kamupani, faapea matagaluega eseese o le Malo o loo tautua ai i le taimi nei.
O le tausaga lenei e 36 na maua le avanoa e galue faata’ita’i ai (observe) i fale faigaluega eseese mo le 6 vaiaso.

- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025













