“O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata”

0
6382

“O la’u tausinioga ua i’u ma le manuia, o se meaalofa lea mo si ou tama ua fai’ilagi lana folauga aemaise o si o’u tina sa tapua’i ma loimata..”

O le faasoa lea a le tamaitai o Aloema Salu, 35 tausaga mai le afioaga o Saleimoa, na sili aoao (dux) i le vasega o le au faa’uu a le aoga o le Tesese Institute mo le tausaga 2023.

Tā’ua e le tamaitai o Aloema, maimau pe ana soifua mai pea si ona tuaa, sei ona molimauina le sini sa ia moomoo iai.

“E talanoa mai ma apoapoa’i mai lava o le aoga.. ia e finau ina ia maua sou lumanai..”

“Peitai, o lea ua ia lē molimauina lenei aso ma le faamoemoega o lea ua tini..”

Faasoa Aloema, e na te manatua pea si ona tina i lana tapuaiga, ae maise e le’i auai atu le loomatua i le laugatogi ona sa tapuai mai lava ia i le fale.

“E manatua si ou tina, e le galo ana upu.. a manuia lau aoga, o le ki lena mo lou lumanai manuia..”

O le tamaitai o Aloema sa sili aoao i mataupu e tolu e aofia ai le Business Communication, Office Administration ma le Computing.

Ua faauuina nei o ia i le faailoga, Diploma in Computing ma ia faailoa ai lona naunautaiga e fia faa’auau pea aoaoga mo le tausaga fou.

Sa momoli mai ai se feau faamalosiau a le ua sili aoao i le Tesese mo tupulaga talavou.

“Education is the key for a better future”

“Ia e faamaoni i le aoga.. aua le fiu ma ia aua le faavaivai ae o le sili o na mea uma ia faamuamua Le Alii ma alofa i ou matua.”

Ua faailoa e le tamaitai o Ema, e fia avea o ia ma taitai poo se faauluuluga o se kamupani poo se matagaluega i le lumanai.

O le aoga o matata eseese o le Tesese Institute ua 54 nei tausaga talu ona faavae mai i totonu o Samoa.

E toa 66 le aofai o i latou na faauu i lenei vaiaso.