O se Faanoanoaga tele mo Falelatai ma Samatau Tuuaiga i le Faaogaina o Tupe mo le Poloketi Miliona

O se faanoanoaga tele i lo matou Itumalo, le matou usitaia o faiga faavae, ae mulimuli ane ua aumai le matou Itumalo i le lisi o e o le a taofia mai le faamanuiaga.

O le saunoaga lea a le Sui faipule o Samatau ma Falelatai i se faatalatalanoaga i fafo mai o le Maota Fono o Samoa, e faaali se leo o le Itumalo o loo tuuina mai i le lisi o le toasefulu lea sa taua e Laauliolemalietoa, ua latou lē usitaia faiga faavae o le faaogaina o le $200,000 afe.

Saunoa le afioga i le faipule ia Lupematasila Tologata Galumalemana Togia Tile, ua maea ona sueina a latou tusi (audit) i le faa’aogaina o le seleni.

O le itu lea sa faateia ai o ia ina ua lauina mai e le Taitaifono fono a le FAST le lisi o Itumalo, o loo sau ai ma Falelatai ma Samatau.

“Ou te molimau atu sa faa’aoga lava ma le tatau, i auala na faatonu atu ai i taiala mai le Matagaluega e anaina le poloketi, le afioga i le Minisita ia Leota Sio Laki Lamositele, peitai o le faanoanoaga tele lena, ona ua saunoa Laauli, o le itumalo o Falelatai ma Samatau, o le isi lea itumalo o le a faapaka pe faamalolo.”

Saunoa le alii faipule, o Samatau ma Falelatai o loo mulimulita’ia lava taiala na tuuina mai le Malo.

Saunoa le afioga ia Lupematasila, “E fia fai manuia le itumalo o Samatau ma Falelatai. O le mafuaga lena sa mulimulita’i ai lava i le faa’aogaina o le seleni.”

Na ia tāua foi o le Aso Toanai na sei mavae atu nei na oo atu ai le asiasiga a le Komiti o le Milioiana i lona itumalo, ae talosia ua faamalieina le Komiti i tulaga uma ua iai nei e tusa ma le latou asiasiaga.

O le afioga Lupematasila Tologata Togia, o lona uluai taimi lenei i le tofi o le itumalo. Sa ia galue o se Ofisa Sili o le Malosiaga Faaeletise (EPC) ona faamavae lea ina ua tauva i le filifiliga i le 2021 ma tofia ai o ia e fai ma faipule o lona itumalo.

(14)