O se Faaiuga e Maua ai le Toafilemu ma se Manuia o le Itumalo Sagaga 2

0
587

Ua faamauina e le Faamasinoga Maualuga le tafa ai o se finagalo o se tasi sa Sui Tauva mo le tofi o le Itumalo o Sagaga 2 le afioga ia Fata Ryan Schuster, e toe faaulu i tua lana tagi e faasaga i le afioga ia Maulolo Tavita Amosa, o lē sa manumalo i le faigapalota laititi ia Novema o le tausaga ua tea nei. Sa faapena foi la ona tuuina mai i tua se tagi poo se counter-sue a Maulolo e faasaga ia Fata Ryan.

O lenei faaiuga e pei ona saunoa iai Fata ma Maulolo, ua lāua tuuina ai le faamuamua i le tausiga o le filemu ae maise o le nonofo fealofani o le Itumalo, faapea le afioaga o Afega.

O Fata Ryan o se sui o le Faatuatua i le Atua Samoa ua Tasi (FAST) ae o Maulolo Tavita o le sui o le vaega faaupufai e Puipuia Aia Tatau a Tagata (HRPP).

Ina ua maea le faamasinoga sa saunoa ai le afioga ia Fata Ryan, o lenei mataupu, sa lē faigofie ia te ia, ae ua ia faamuamua lava le tausiga o le filemu.

“E le’i faigofie la’u faai’uga o le ave i tua o la’u tagi, ae faafetai lava i le musumusuga a le Agaga Paia o lo tatou Ali’i, o lea ua manumalo lona finagalo.”

Saunoa Fata Ryan o lea ua ave lana faamanuia i le susuga ia Maulolo mo ona tiute i le Itumalo, ae momoli lana faafetai tele ia i latou na lagolagoina o ia i le faigapalota.

“Ae finagalo malilie outou i sa’u faai’uga ua fai, ae o lea ua ou pulea lou loto..

“Faafetai foi i o’u aiga mo le lagolago, o lea ua ou faia le auala e faato’afilemu ai le Itumalo..”

Sa saunoa Fata Ryan o se tasi foi o tamalii faipisinisi i totonu o Samo, o lea ia tapena pea mo le lumanai.

‘O lea foi laa toe tapena, afai ae aulia atu lena taimi o le isi faigapalota i le lumanai, ma maua le ola ma le malosi, o le a toe tauva foi i lena faamoemoe.”

I le saunoaga a le afioga ia Maulolo i le maea ai o le faamasioga, na momoli lona agaga faafetai i Le Atua ona ua iu ma le manuia le faamoemoe sa feagai ai;

“E momoli le faafetai i le susuga ia Fata Ryan ona o le finagalo malamalama lea ua taoto ai le agatonu i lenei mataupu.. lea ua manatu e toe faaui ai i tua lana tagi”.

“O lea ua uma na ma feiloai, ma faalelei foi le ma va, lea foi ua ou faamanuia iai i tiute o loo feagai ai ma ia, ma o lea foi ua faamanuia mai Fata Ryan i le Tofi o le Itumalo.”

Na saunoa Maulolo, o se tasi lea o tulaga tāua o le a tuuina atu iai lana faamuamua, o le faaleleia lea o le agaga o le galulue faatasi i totonu o le Itumalo, ae maise le lotoifale o le afioga o Afega.

Mo le silafia o Afega e lua faiganuu o loo iai i le taimi nei talu mai ni feeseeseaiga i tausaga ua mavae.

“E le matagofie foi le fai o sau lauga poo sau faamatalaga ae o loo opūina i le maitau mai a le Itumalo ma le atunuu..”

Na saunoa foi Maulolo o lea ua ia galue loa ma finau e faataunuu mea na ia folafolaina i lana faalauiloa, ae maise o ana upu sa laugaina i totonu o le Palemene.

“O le a faaauau lava ni galuega, auā se manuia o le Itumalo..

“Sa ou asiasi nei i le aoga i Sagaga College, lea foi ua faia feutana’iga mo le TVET lea na ou lauga iai.”

O le TVET poo se aoga o matatā eseese sa talosagaina e Maulolo mo le Itumalo o Sagaga 2, auā le aoaoaina o alo ma fanau e fia agai e faatāua lea itu o le soifua aoaoina i le practical, e ese mai le academic.

O le maea ai o Faamasinoga o tagi poo petitions nei, ua maea ai loa ma le filifiliga a Samoa i lana Faigapalota Tele o le 2021.

O lea ua 31 FAST i le 20 a le HRPP, ae o loo tālia le faatautoina o sui tamaitai e toalua. O i laua e sili la pasene, o Aliimalemanu Alofa Tuuau ma Faagasealii Sapoa Feagiai o le HRPP.