“O loo lava faiaoga pe a fua i le aofai o tamaiti aoga i Samoa”

0
341

O loo lava faiaoga pe afai e fua i le aofai o tamaiti aoga i Samoa, ae o le faalatonu o loo tulai mai, o le tofu o le nuu ma le aoga, ua lē lava ai le faasoa a le Matagaluega.

O le mau lea a le Afioga o Aoga Taaloga ma Aganuu ia Loau Solamalemalo Keneti Sio e tali atu ai i talosaga a nisi o sui o le Maota i le faatalanoaina o le Tala Faaopoopo o le Tupe o loo faagasolo nei.

Saunoa Loau, “Ua tofu le nuu ma le Primary School. E tiga lava ona na’o le valu aiga o leisi nuu e fai lava le Primary School, ona alu ai lea o resources, ae ua le tuufaatasi ma le isi nuu.”

Sa ia aumai ai foi le faataitaiga.., “E pei o afioaga o Falevao ma Lalomauga, o nai tamai nuu lava ae lua faleaoga tetele o loo tutu ai!;

“Ona alu ai lea o resources…faleaoga ī, faleaoga mai le tuaoi, ae le mamao lava, e vā i le togafa’i.”

Sa faailoa e Loau o faamaumauga lava ia, o la e lava faiaoga pe a fua i le faitau aofai o tamaiti o le atunuu.

Peitai sa taua e le Minisita o Aoga, o le faafitauli o loo tulai mai, o le manao o le faipule, e fai le faleaoga o lo latou lava nuu, ae le taliaina se tuualalo e tuufaatasi.

“Lea la e mafua ai le sioki lea”.

O le faauilavea a Lealailepule Rimoni Aiafi na ia taua ai, o le Matagaluega o Aoga na te tuuina atu le faatagaga e fai ai faleaoga. Sa fautuaina e Lealailepule le Minisita e silasila totoa i lea tulaga.

“O ai e avatua le faatagaga? Ao lei faia le faleaoga e tatau ona avatu le maliega a le Matagaluega. O le Matagaluega e fuafuaina resources.”

O le mataupu faatatau i le tuua e faiaoga o le galuega i Aso Lulu o le totogi a le Malo, ae agai mai i Apia i taimi o aoga.

“Nei galo i le maota ua togiga faatasi uma lava le Komiti o aoga tulagalua ma faiaoga e aofia ai ma faiaoga fesoasoani teacher aides, ma le tea lady…o latou na lea o loo omai ma tusitupe e tala atu ai totogi a faiaoga.