“O lenei tauvaga, e mo Samoa atoa” – Tapena Moemoana mo le Tausala o le Pasefika

0
82

Tusia: Taunuuga Toatasi, Ofisa o le Sooupu a Samoa.

E to’afitu lalelei mai atunu’u ‘ese’ese o le Pasefika, ua sauni e tauvā e sa’ili ai se Lalelei o le Pasefika 2024-2025, e sui tulaga i le Tausala o le Pasefika 2023-2024 iā Josie Nicholas mai Papua Niu Kini.

O lea fa’amoemoe tele o le a fa’ataunu’uina i le Aso Sa, 28 Iānuari 2024 se’ia o’o atu i le Aso To’ana’i, 04 Fepuari 2024.

O Tausala o le a tausiniō, e mai atunu’u o Tonga, Papua Niu Kini, Marshall Island, Amerika Samoa, Palau, Nauru fa’apea ai ma Samoa.

O lenei tausaga e atoa i ai le 34 tausaga talu ona fa’avaeina lenei tauvaga tele talu mai le tausaga e 1987.

 

Pule Sili o le Digicel o loo lagolagoina malosi le Tausala o Samoa 2023-2024. Ata Pueina: Rodney Tafeaga SGN.

O le asō, na fa’alauiloa aloā’ia ai le lava tapena o le Lalelei o Samoa iā Moemoana Sa’afāto’a Schwenke e tau’ave le tagāvai o Samoa mo lea fa’agatama fa’avāomālō.

Saunoa le Tausala o Samoa i le feiloā’iga ma Tusitala ma le Aufa’asalalau;

“I a’u tapenaga mo lenei fa’amoemoe, e to’atele i latou sa fa’aāli lo latou lagolagosua aemaise o le nofo tatalo ina ia taunu’u manuia ma maua se ai auā le tapuā’iga a si o tatou atunu’u.

“O lenei fa’amoemoe, e lē mo a’u, ae mo si o’u atunu’u pele o Samoa, auā ua afua ona ou tauvā i lenei tauvaga tele, ona o le tau’aveina o le pale o le Tausala o Samoa, o le fa’asinomaga ou te tiu ai, ma ou mimita ai.

“Afai e fesili i le tāua o lenei fa’amoemoe, e mafai ona ou fa’apea, o lenei tauvaga e mo Samoa aoao, aemaise o tatou tagata e le gata o totonu lava o Samoa, ae fa’apea fo’i i latou o lo’o alala ma pāpā’ā’ao i atunu’u i fafo.

Ata Pueina: Leota Marc Membrere.

“O se fa’amoemoe mo tama’ita’i Samoa mo le aga’i i le lumana’i, e unā’ia ai le amanaia pea o le tatou mau i le fa’atāua lea o le tulaga tau i puna’oa fa’alenatura.

“Tatou te unā’ia pea le tatou fa’atāua i le tulaga o le suiga mā’ale’ale o le tau e pei ona a’afia ai le tatou atunu’u, aemaise o atunu’u o le Pasefika.

Ua maua nei i le SOS Togafuafua ma Salelologa.

“E ui lava e ‘ese’ese o tatou tupu’aga ma atunu’u tatou te aumau ai, ae o ā tatou tu ma aganu’u, o le tatou so’otaga lea ma atunu’u o le Pasefika.

“Fa’afetai Samoa i lau lagolago, o ai a’u nei le tagata fa’atauva’a ua outou manatu mai ai, fa’afetai tele.”

Ua ta’utino le Tausala o Samoa, o le a tu’u atoa lona mafai, lona silafia ma lona tomai, e fa’atino ai le fa’amoemoe i le mauāluga e gata ai, auā se ai mo Samoa.

O le Kamupanī Telefoni a le Digicel o lo’o latou lagolagoina, taumafaiga a le tatou Tausala o Samoa mo lea fa’amoemoe tele.

Faasalalauga Taua

Avanoa Faigaluega 

Avanoa Faigaluega

Job Opportunities