I le toe foi mai ai o le Manu Samoa taitoafitu e ala i le maualuga o lana faatinoga o le taaloga e pei ona molimauina i vaiaso e lua o taamilosaga taitoafitu a le lalolagi (HSBC) – e le gata i le faafiafiaina ai o le au tapuai a Samoa soo se atunuu o le lalolagi, ae ua faatupulaia ai le lagona i tupulaga talavou mo se avanoa mo i latou e filifilia ai mo le Manu Samoa 7’s.
I le toe foi mai ai o Samoa i le taamilosaga taitoafitu sa latou ausia le toavalu pito i luga (quarterfinal) i Singapore ina ua ma’ea ai o ni taaloga faigata e pei ona manumalo ai ia Sepania ma Egelani.
I le vaiaso sosoo ane ai na agai atu ai i le taamilosaga i Vancouver i Kanata, ma faamauina ai le faatoa toe oo lea o Samoa i le ausia lea o le fa pito i luga (semifinal) talu mai le 2018.
O le siitia maualuga o le faatinoga o le au taitoafitu e pei ona molimauina, ua tumutumu ai uo, upega tafailagi i le faaaliga o le fiafia a le au tapuai e ala lea i video, tik tok, ma ata faapitoa e molimauina ai nei taamilosaga e lua.
Na faailoa ai se mitamitaga o ni talavou mai Leulumoega i Upolu, na tosina latou vaai ma latou pueina ai se ata video e faa’ata ai se sikoa mataina a le Manu.
O le au uso ia Penitito ma Robert Lafo, ma le la tausoga ia Penani Masaga, na latou faailoa le faagaeetia i le tulaga maoa’e sa mafai lava ona faatino e tatou lava tama fanau mai Samoa, e aunoa ma ni tama taaalo tau aami mai fafo.
Ae maise faatoa ma’ea ona tuumuli ese mai ni tama taa’alo se toalima na filifilia mai atunuu i fafo atu o Samoa, ae ua le fiafia i latou i tapenaga a le au.
Na faailoa se manatu a sē tasi o talavou ia Penitito Lafo, o le taitai ulu (Head Boy) a St Paul VI College, e faapea “afai o lea e mafai e nei alo ma fanau sa taaalo atu i Samoa nei, o lona uiga e mafai foi e i latou.
O Robert Lafo e vasega 10 i le St Paul VI College, ae o Penani Masaga, o se taitai o le Kolisi o Avele (Prefect) na latou faailoa mai i le SGN e faapea “o le tulaga maoa’e na va’aia i le faiaoga ia Muliagatele Brian Lima ma le au atoa, ua saga toe faamalosia ai le matou miti poo le matou sini i le taaloga lakapi. O loo matou taa’alo i au lakapi a matou aoga, faapea foi ma au a matou nuu, ae matou te fia fai atu lava ia Brian, “O loo matou avanoa ma matou sauni atu mo lau filifiliga,” o Penani Masaga lea.
“Matou te fia faailoa atu lo matou fiafia tele i le tatou au, o loo fai ma sui o Samoa i le lalolagi. Ua toe maua e i matou le fiafia e tapuai ma toe faamanatu o matou miti – fia oo i le mea o loo tou iai nei”.
O le faatinoga e i latou nei o se tasi o sikoa mataina e pei ona iai le faaiuga o le vaiaso, lea sa faaupuina e le au faasalalau, o se sikoa na lele atu ai i luga o le laina sikoa e aunoa ma se vaai iai (No Look Dive Try) mai le sui o le Tamauli o Uaina Sione, i le taaloga ma Egelani i le taamilosaga I Singapore.
Fai mai Masaga, o lenei Ata video sa pueina ao matou agai atu i le faatoaga mo le aumaia o se meamata faapea ma fafie ma popo mo gasesega o le afiafi. Ae o le ata sa pueina e le isi matou tausoga o Tiueti Faafiti.
Matou te mananao e faamanatu le tulaga mataina e pei ona iai taumafaiga i Singapore ma Vancouver, ae matou te fia momoli foi o matou moomo’oga ia manuia le alo atu i le taamilosaga i Toulouse.
“O le matou miti matou te fia taa’alo le au taitoafitu a Samoa i le lumanai, i lalo o le taitaiga a le faiaoga o Brian Lima, ona ua ia pikiina nao tama mai Samoa nei, best a local players,” o se lagona lea o Penani Masaga, le taitai mai le Kolisi o Avele.
Ae o Penitito Lafo, o se taitai ulu o le Kolisi St Paul VI na ia faapea mai, “Manu aua nei outou faavaivai, faamalolosi, o loo matou tapuai atu pea mo outou, ia outou manatua le tatou atunuu pele o Samoa pe’a outou tamomoe i totonu o le malae.”
O le Manu Samoa taitoafitu, ua toe taliu atu nei mo le latou togalau’apiga i Dubai, e tapena ai mo le isi vae o le taamilosaga taitoafitu (HSBC) i Toulouse Farani.
“O aso uma matou te o ai i le faatoaga, ao iai pea Samoa i vavao o le Koviti, matou te miti ai lava o se aso oi luma, e avea ai matou o ave fua i le au taitoafitu a Samoa. O faanaunauga ia o i latou nei.
Na faaiu lo latou moomo’oga, i se feau na momoli mo le au taitoafitu.
“Uso e te faalogoina loa le vaivai ma le lē la’va, ia e manatua mai le toa afe o i matou i Samoa nei, o loo matou fia maua le avanoa e pei ona outou maua nei e taalo ai mo le Manu Samoa. Taalo malosi mo matou uma i Samoa nei…”
(0)
