21 September 2019 Apia Samoa. O se sauniga e ese mai i sauniga e masani ai, ona a iai se e maliu pe valaau fo’i iai le Atua, o taimi ia o aiga, e opoopo mai ma faamafanafana, o le taimi o matua pe afai ua avea se tasi o le fanau.
Ae ese mai le sauniga e falelauasi ai le alualutoto na maua o tafetafea i gatai o Laulii, mai le tele o isi lava sauniga faapea i lo tatou atunuu.
Na fai i le malumalu o le Ekalesia Aso Fitu i Lalovaea ma nofoaga e faamavae atu ai Samoa ia Tautai Aumaga.
Sa auai le matagaluega o leoleo, o sui o le Australian Federal Police i Samoa nei, o le aoga a le Aso Fitu i Lalovaea e ala i fanau ma le aiga faiaoga, o sui mai le afioaga o Laulii faapea ai nisi o le atunuu na o latou lagona faatasi le alofa i fanau, ua avea e aunoa se tala, o se taga, ae poo fesili foi pe aisea lona mafuaaga ua fai ai ia faapea.
O le afioga ia Su’a Fuiavailili Egon Keil sa fai ma sui o Samoa e faamanuia atu i le malaga a Tautai, atoa ai ma le faamanatu mai, i ni upu e faailoa ai le taua o fanau, faapea ai ma le feau mo i latou o fememea’i pea ma le mautonu i lenei faafitauli.
O le fanau aoga na o latou sunu’i i loto ma finagalo  le feau, e faaleo ai o latou lagona faale fanau,  ia Tautai e le ese mai, i nisi o latou tei laiti, e ala ia latou solo ma tusitusiga, atoa ai ma pese.
O upu faapea “E le’o a’u o se otaota poo se lapisi, aua le lafoaiina a’u”
O Tautai e lua iai pepe ia na maua o lafoai, o lea ua tuuina atu lona tino i le eleele ae o loo faatali le isi pepe seia maea mai taotoga mai fomai faapitoa. O le saunoaga a le alii komesina o leoleo na ia faaleo ai e faapea.
“O le oti o se tamaitiiti ua atagia ai le lumanai ua leiloa, o le leiloa foi lea o le ola fou, o le faaosofiaga, ma le faamoemoe.”
“E oo lava i tulaga vae laiti e mafai ona iloga i le lalolagi nei”
Sa faailoa foi le agaga faafetai o le alii komesina i le tina ia Cillia O’Sullivan i lona alofa naunautai i fanau ua mafai ai ona tutufaatasi ma le faalapotopotoga o tamaitai leoleo le Police Women Advisory Network  latou te saunia lenei sauniga mo Tautai.
O le tina ia Cecilia O’Sullivan sa ia faatupea le sauniga ma totogiina a la poloka i Tafaigata.
O lenei faafitauli e le gata o lea ua avea nisi o fanau ae o taumafaiga foi ina ia tafi ese lenei tu mai lo tatou atunuu, ina ia faasao le ola, ma ia laveai foi tina mai mafuaaga ua ala ai ona tutupu nei faafitauli.
O le valaau a le malo e ala mai i le alii komesina o leoleo, ina ia faaoga auaunaga fesoasoani mo i latou o loo iai faafitauli ua mafua ai le maliliu o fanau.
“E Â le molia e leoleo se tina na te tuuina atu se pepe o fuafua e lafoai i le matagaluega, ae o le a fesoasoani le matagaluega i le pepe inaia faasaoina.
O le faaiuga o le sauniga umi sa faia i le Aso Tofi na tuuina atu ai le tino maliu o Tautai mo lona tuugamau ua saunia i le fanua maliu i Tafaigata.
