“O le fa’atāuaina o le fetausia’i ma le fe’oe’oea’i, e mapo ai so’o se tatou taumafaiga”

0
37

O le saunoaga a le Palemia, Afioga Fiame Naomi Mata’afa i le sauniga o le faamanatuina o le 60 tausaga o le Malo tutoatasi o Samoa e le afioaga o Lepea sa faia i le Aso Lua, 30 Me, 2023.

O lea ua mautū i le nofoali’i o le Atua le taulaga o le fa’afetai na molia e le Susuga i le Ta’ita’i o le Sauniga. Ua fa’ailoa fo’i le feau fa’aleagaga o lenei taeao, auā le tausiga alofa a le Atua, lea o lo’o soifua laulelei le tatou Nu’u, aemaise le fa’ataunu’uina o lenei fa’amoemoe sa lupe.  

Ou te ofo alofa atu i le nofo ā Fa’afeagaiga o lo’o punoua’i i le afio’aga nei auā le vala’auga o le Talalelei. Mālō le soifua laulelei.

Ou te fa’apa’i atu i le pāia mauāluga o le afio’aga, mai ona ao se’ia o’o atu i ona i’u. Afio mai o Faumuinā o le Tupufia, Afifio mai Usoali’i ma Tamāpa’a. Alalata’i le Tauaitu ma le Saofa’iga a Ātua.

Ou te fa’atalofa atu fo’i i le afioga i le Tofi o le Itumālō – le afioga i le Minisitā Lagolago o le Matāgaluega o le Palemia ma le Kapeneta – lau Tōfā Manuleleua Paletasala Tovale. 

O le folauga a Samoa i le 60 tausaga o lona Mālō Tuto’atasi, ua autausagā, ma e tele mafua’aga e tatau ai ona tatou fa’amanatuina pea le tāua o lenei matāti’a. Peita’i, ou te taofi o le mafua’aga tupito lona tāua ma lauāluga i la tatou fa’amanatuga, o le fa’amaoni o le Atua, ma lana ta’ita’iga mamana i si o tatou atunu’u.  

O lea ua fa’ai’u’i’u le fa’amanatuina o le 60 tausaga o lo tatou Mālō Tuto’atasi. O taeao e fa’ai’uina ai. A’o le naunauta’iga lea o le Kapeneta sa ta’ui ai lenei fa’amoemoe, ina ia maua avanoa o afio’aga ma Itumālō e sami lo tatou tuto’atasi i o latou lava laufanua. E avea fo’i ma laolao lelei e mafuta fa’atasi ai, ma fe’oe’oea’i, aemaise lava i le i ai fa’atasi o nai o tatou matua tausi ma fanauiti.

A faitau le atunu’u i se ‘āiga e lima malosi, ona fa’apea lea, o se ‘āiga maopoopo. E malu ana measina, ma e atagia ai le ta’ita’iga a le Sa’o ma matai o sea ‘āiga. O se afio’aga fo’i e malu ana pulega ma amanaia le sao o tagata o le Nu’u, ma taunapo i le alofa ma le fetausia’i, e soifua fiafia ma ola atia’e tagata uma. Ona tafe lea o fa’amanuiaga, auā e afua mai mauga le manuia ma le amiotonu o se nu’u. E mau fo’i lona lau’ele’ele ma lona gataifale, ae sili ona tausa’afia ma tauagafau ona tagata. Ou te manatu, o lo’o olaola lenei tulaga i si o tatou Nu’u.    

Ua ‘ese nei aso i le tele o lu’itau o lo’o tatou feagai nei. E fa’apea fo’i i faigānu’u ma le tausiga o ‘āiga. E lu’itauina fo’i so’o se atunu’u ma so’o se Mālō i vala ‘ese’ese o lenei soifuaga. A’o tatou o Ta’ita’i, e lave i manino, toe lave i le ‘a’ava, ina ia malu le fa, ma lē manunu le toau i lo tatou nofo tuāvae ma le nofo fealofani. O le ‘ua lea e fa’alanu mā’ave’ave i le tōfā ma le moe, e leleo ai Lepea ma Vaitāgutu.  

O le fa’atāuaina o le fetausia’i ma le fe’oe’oea’i, o le auala lea e mapo ai so’o se tatou taumafaiga. Pe amatamea le Mālō, pe fa’apogai fo’i afio’aga ma Itumālō? Afai e maopoopo itutino uma, tatou te i’u i le fa’aeaina, ma e manuia sea taumafaiga. O le feau fa’amalosi’au lea mo lenei fa’amoemoe aemaise si o tatou Nu’u. 

O lo tatou Mālō Tuto’atasi, o le Mālō o tagata Samoa uma. O le fa’asolo ma le ula a Samoa, tatou te sa’ili manogi fa’atasi, ma su’i ma so’oso’o fau ina ia manuia si o tatou atunu’u mo le asō, ma le lumana’i. 

Le pāia o lo tatou Nu’u, ia tumau pea i le fealofani. O le tino lea o le feau o le talalelei, ina ia fai i tatou ma So’o. E tumau pea le fa’atāuaina o le anava o le fa’amanatuina o le 60 tausaga o lo tatou Mālō Tuto’atasi, ia tatou ‘folau ma fa’atuatua’. Folau ma le loto tele, ma lalafo i le Atua o tatou fa’amoemoega uma. Auā afai tatou te au fa’atasi ma Ia, o ai ea sē e fa’asagatau mai? 

O le tatalo a le tatou Mālō, ia saga fa’amanuia le Atua i le Pulega Mamalu a Ali’i ma Faipule, ma itutino ‘ese’ese uma o lo tatou Nu’u, e o’o atu lava i fanauiti. Ia fa’amanaina pea le tatalo ma le ‘upu folafola a ana auauna auā taumafa fa’aleagaga mo le afio’aga. 

Ia manuia le fa’amoemoe i lenei taeao. 

SOIFUA.