Ua faasoa mai le sa avea ma Palemia i le afuaga na fausia ai le nofoaga, Matagialalua Friendship Park.
I se finagalo faalia o le afioga Tuilaepa Sailele Malilegaoi, na ia saunoa ai, o se alii Samoa i Niu Sila, David Wong-Tung, o se tagata masani ona asiasi i atunuu latou te faatauaina poloketi waterfront. O ia lea sa aumaia mafaufauga i ituaiga poloketi e aofia ai itu tāua e pei o le faaleleia atili o le siosiomaga aemaise o le faaauleleiina mo le atunuu lautele.
O le isi tamalii sa.tuualalo foi i lenei poloketi o le afioga Tuatagaloa Joe Annandale. Sa ia tuualalo i le faatauaina lea o lenei ituaiga poloketi, ae maise o se stage e faatino ai koneseti aua le maimoa o le atunuu faapea ē tafafao mai fafo.
Ona amata ai loa lea ona fasalalau. E 14 kamupani mai fafo sa latou faailo latou te mananao e fausia, ae o le lape, e faamoemoe uma kamupani nei e faatupe atu e le Malo Samoa le fausiaina o le poloketi.
Ina ua alu le faasalalauga na muamua lava ona piki mai e se tasi o taitai o Aukilani, le Mayor ia Len Brow. Ma agai mai ai loa lana asiasiga i Samoa ne.
“Lea foi na faamatai e lo matou nuu i le suafa Tauaaa’i.”
O Brown o se tagata sa avea ma faatonu o le aai o Aukilani, faapea foi ma le aai o Manukau i Niu Sila.
“Na ia faailoa e fia fai sona sao i le poloketi. Sa talosagaina le Malo o Niu Sila, ma faamatuu mai ai loa e Niu Sila le $10 miliona tala.
Na toe talosaga se isi fesoasoani ma na tali fiafia le ofisa, maua foi lea o le seleni atoa ma le faaopopoga o le galuega, o le a latou faia le beautification, i lalo o se poloketi e faaigoa o le Waterfront Development Plan – e fausia e amata atu lava i Mulinuu seia gata mai i Vaiala, atoa ai ma le pulevaa e faia i gatai tonu lava o le uati. O Matagaluega sa taitaia le faatinoga o le Waterfront o le Suosiomaga (MNRE) ma le Turisi (STA).
O nei vaega uma o loo aofia ai totonu ma le nofoaga mo taaloga o le oneone voli matafaga (sand beach volleyball) ma isi malae e mafai ona faaogaina mo soo se taaloga. Lea foi o loo iai ma le stage mo faafiafiaga.
Saunoa Tuilaepa, e faateia i le ofi mai o le Malo Saina latou te fia fesoasoani, ae faa’auala mai lea fesoasoani i se foai a se itumalo poo se aai tele o Saina o Huizhou City i le itumalo Guangdong Province.
“O ina lea e faauma ai e Saina le galuega”.
Saunoa foi Tuilaepa na toe fesootai mai le Malo Niu Sila o loo iai lava le seleni o lo totoe.
“Ona ou faailoa lea iai e agai la latou mo le faaleleia ma le fausia lelei o le STA village lea e i tafatafa ifo o le nofoaga ae tali mai Niu Sila, o le a iai ma le Maketi i Savalalo i le latou fuafuaga..”
Saunoa foi Tuilaepa o se vaavaai mamao lea mo le fausiaina a se nofoaga mo tafaoga ma fiafiaga mo le atunuu lautele.
Sa aumai ai foi ma se tuualalo mai le Taitai o le Itu Agai, ina ia silasila ifo e faatele ni moli ma ia faamalamalama le nofoaga atoa.
“Ia iai ni leoleo e tiute i taimi uma mo le puipuiga o lea nofoaga, ma ia saogalemu latou o le a tafafao ai, ae maise ia aua nei faaleagaina aseta.”
“Ia silasila ifo foi i le saogalemu o le agai atu i le uati e faasolo atu i luma o le maota o le Malo, e tele ina faatino ai tu’uga taavale, nei afaina se nisi o le mamalu o le atunuu..
“Ae lelei ona fausia ni poloka sima pei o atunuu o loo i fafo mo le puipuiga o tagata lautele.”
O le vaiaso na tea nei sa saunoa ai le afioga le Palemia Hon Fiame Naomi Mataafa i le tatalaina aloaia o lea poloketi ma folafola ai foi itu taua o lenei galuega, ma faafetaia ai le Malo o Saina.
(7)
