E $10,000 NZD le tupe ua fesoasoani mai ai le 600 o tagata Samoa o loo galulue i galuega faavaitaimi i Hawkes Bay i Niu Sila atoa ai ma le kamupani fasi manu o le Silver Fern i Dunedin, mo galuega faatino e fesoasoani ai i le faamai o le misela ua aafia ai Samoa nei.
O lea tupe sa tauaaoina atu i se siaki e le Minisita o Alamanuia Ma Leipa ia Lautafi Selafi Purcell i le alii Minisita o le Matagaluega o Tupe ia SIli Epa Tuioti i le taeao ananafi i le Faletupe Tutotonu o Samoa i Apia.
Saunoa le Alii Minisita ia Lautafi Selafi Purcell, “O lenei tupe sa tuuina mai e nai fanau ia o loo galulue i le vaega lea o Niu Sila lea e iai Hastings ma Napier ia te a’u a’o o’u iai i malologa i Niu Sila”.
“O sa latou lea meaalofa poo so latou sao lea e tuumai ia Samoa aua le alo atu e tau tineia le faama’i o le misela.”
Na faailoa e le Alii Minisita o se faafiafiaga a nai fanau nei sa faia mo le Kerisimasi ma tuuina mai ai loa le siaki $10,000 NZD.
Sa fesoasoani tele le tamaitai ia Lemalu Nele Leilua i le tuufaatasia o lea meaalofa mai ia alo ma fanau a le atunuu.
Na saunoa le Alii Minisita “E lagona le agaga faafetai i o tatou tagata nei ona e le o tele ni a latou tupe o maua, o loo taumafai mai foi le atinaega o aiga i Samoa nei, peitai e maeu le loto atunuu.”
O le faafetai a le Malo o Samoa sa faaleo lea e le Alii Minisita o Tupe ia Sili Epa Tuioti, ma ia faailoa ai o loo gata mai le faitauina o le aofaiga o meaalofa ua iai nei mo le misela i le $700,000 lea sa faailoa i le Palemene i lona tauaofiaga talu ai nei.
Ae o loo faamauina pea fesoasoani ua faaoo atu, i tua mai o lea taimi, e oo mai lava i le taimi nei, ma o le a mafai ona faalauiloa mai ia fuainumera ma i latou na ala mai ai le fesoasoani, i le tala faatatau faaopoopo lona lua o le tala o le tupe i le tausaga lenei.
Ua toe faaopoopo atu foi e le Malo le isi 1 miliona i le 6 miliona sa tuuina atu i le Komiti o Faalavelave Faafuasei ma le amatagaluega o le Soifua Maloloina, aua lava tulaga manaomia mo le tineia o le faamai o le misela.
Saunoa Sili, “Afai e toe manaomia se isi tupe e tatau ona toe tagai iai le malo e toe ave se isi tupe pe a faapea e manaomia se isi vaega tupe, o loo faamoemoe ma faalagolago i le Komiti e logo mai le malo, o le taua foi o mea faapea o le responsibility lava o tatou o a tatou lava tupe e fai a’i, o fesoasoani mai fafo ma o tatou aiga o mea faaopoopo na e iai, o le 7 miliona lava ia lea ua tuuina atu mai le malo, ae a faapea e toe manaomia e tatau lava ona toe faaopoopo se isi vaega tupe.”
(6)
