O loo mafanafana le alii loia a le HRPP e leai se tulaga e faapopoleina ai mataupu o loo i luma nei o le Faamasinoga Maualuga e tusa ai ma lu’i faasaga i Sui Tauva a le vaega faaupufai.
E tāpunia le taimi faatapulaa e mafai ai ona lu’i faaletulafono e le isi Sui Tauva le isi Sui Tauva – e 11 le aofai o mataupu sa faauluina atu i le Faamasinoga Maualuga.
Mai lena 11, e 6 lu’i na faaulu e Sui Tauva o le Faatuatua i Le Atua Samoa ua Tasi FAST ae 5 lu’i na faaulu e Sui Tauva o le Samoa ua Potopoto SUP.
E leai se lu’i na tuuina atu e se Sui Tauva o le vaega faaupufai e Puipuia Aia Tatau a Tagata, ae 5 ni lu’i faasaga i le HRPP.
O se vaaiga lea i mataupu faasaga i Sui Tauva a le Vaega Faaupufai o le HRPP e pei ona faasoa mai ai le alii loia auā lava le nofo malamalama ma le silafia e le mamalu o le atunuu.
Mai le 5 na faauluina – ua toe faaui nei i tua le tasi, ona totoe ai lea o le 4.
O le lu’i a Leatigaga Matafai Lauina Iiga (FAST) – e faasaga ia Pipi Pauli Tevita Tariu (HRPP) – ua toe faaui i tua.
Ua faailoa e Fuimaono, ua ia taulimaina le talosaga a Leatigaga e toe faaui ai i tua lana tagi e faasaga ia Pipi Pauli Tevita Tariu.
O se sui o le Itumalo ua ia faailoa mai, o se tofā mai tapa’au o le afioaga lea ua mafua ai le faaiuga a Leatigaga e toe faaui i tua le mataupu.
Saunoa Fuimaono, “E tolu lu’i o loo agai i le monotaga ae tasi o loo agai i le mataupu o le nofo mau.”
Monotaga
O aiaiaga o le Tulafono o Faigapalota a Samoa e pei ona iai ni suiga na faia i lalo o le HRPP i le tausaga 2019 – e le agavaa se tagatanuu Samoa e tamoe o se Sui Tauva, pe afai e le’i ausia le 3 tausaga sosoo (consecutive years) o loo tautua i le nuu poo se ekalesia e ala lea i le monotaga.
Gagaifomauga 3
1. Laaulilemalietoa Leauatea Polataivao Fosi Schmidt (Taitaifono a le FAST) – e faasaga ia Faaulusau Rosa Lavea (HRPP).
O Faaulusau Rosa Lavea, o ia lea sa fai ma Sui Faipule muamua na faaulufale atu i le Palemene i lalo o le pasene mo tinā (temporary special measure). Sa fai ai o ia ma Sui Faipule tamaitai mai le 2016-2021.
Faleata 2
2. Leatinuu Wayne Soaialo (SUP) – e faasaga ia Ulugia Elon Betham (HRPP).
O Ulugia Elon Betham sa ia tauva mo le nofoa lava lea o Faleata 2 i le faigapalota tele o le 2021.
Faleata 4
3. Paloa Louis James Stowers (FAST) – e faasaga ia Lealailepule Rimoni Aiafi (HRPP).
O le tausaga 2006 na mua’i ulufale atu ai le afioga ia Lealailepule Rimoni Aiafi i le Palemene o Samoa, ma ua 4 ai nei paeaiga sosoo o loo faaauau pea lana tautua i le tofi Faipule o Faleata.
Nofo mau i Samoa
O le isi fo’i aiaiga o le Tulafono o Faigapalota 2019, e tatau ona ausia le tolu tausaga o nofo mau i Samoa le sui tauva, ma e le tatau ona i lalo ane o le 305 aso o le tausaga e te aumau ai i Samoa.
I lea lava aiaiga, o loo iai fo’i vaega o le tulafono e tuu avanoa ai mo togafitiga i atunuu i fafo mo le sui tauva poo se tasi o lona aiga e aofia ai le fanau poo tua’ā.
Faleata 4
4. Ale Vena Ale (FAST) – e faasaga ia Pepe Christian Fruean (HRPP).
O le afioga ia Pepe Christian Fruean ua silia ma le 30 tausaga o galue i pisinisi tumaoti ma ia tauaveina tulaga tau Taitaifono o Komiti Faatonu o Faalapotopotoga Tumaoti e pei o le EPC, Samoa Submarine Cable Company ma le Digicel Samoa.
O le Aso Gafua 28 o Iulai e valaau ai nei mataupu poo lu’i faaletulafono ma faatulaga ai loa aso e suesueina ai tagi taitasi.
Ua ma’ea foi ona faatulaga mai e le Faamasinoga – o le Aso 15 o Aukuso – e oo atu iai ua tatau ona maua mai tali o mataupu uma nei e faasaga i Sui Tauva, a’o lei faia le Palota i le Aso 29 o Aukuso.
Avanoa Faigaluega mo Savaii
Avanoa Faigaluega i le Taula
Avanoa Faigaluega i Faalapotopotoga Tumaoti a le Malo o Samoa
Faasilasilaga Tāua mo le Mamalu o le Atunuu
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
