Tusia: Pesetā Tusiga Taofiga, Sooupu a le Malo. Ua fa’ailoa manino i le asō, le fa’ai’uga a le Kapeneta na faia i le Aso Lulu o lenei vaiaso, ua fa’amautūina ai le mae’a aloā’ia o lelionekarate mo le 3 tausaga a le afioga iā ‘Au’apa’au Logoitino Filipo mai le tofiga o le Komesina o le Matāgaluega o Leoleo, Falepuipui ma le Ola Toe Fuatā’ina.
Na fa’afetaia e le afioga i le Minisitā o le Matāgaluega o Tupe iā Mulipola Anarosa ‘Ale – Molio’o e fai ma Sui o le Mālō ma Samoa atoa, le afioga iā ‘Au’apa’au ona o lana tautua mālō.
E silia ma le 27 tausaga o tautuaina e Auapaau le atunu’u i le Matāgaluega o Leoleo, Falepuipui ma le Ola Toe Fuatā’ina.
Saunoa Mulipola, o se tamāli’i ua afu lana tautua i le Mālō e ala i le auaunaga fa’aleoleo.
Sa momoli ai le fa’afetai fa’apitoa ona o lona afu sisina ma le galue lē fa’alogologotigā a’o iai i ona tofiga i nei tausaga e tele.
O ‘Au’apa’au na amata lana tautua i lea Matāgaluega o se Leoleo, fa’asolo ane ai i le tofiga o le Tā’ai Lua, soso’o ai ma le Satini.
Sa fa’apaleina i le tofiga o le Ta’ita’i Leoleo Asiasi, ma se’e atu ai i le tofiga o le Ta’ita’i Leoleo Sinia.
Mulimuli ane, tofia e avea ma Sui Komesina o le Matāgaluega se’ia tofia ai e le Kapeneta i le ogātotonu o le tausaga e 2022 e avea ma Komesina o le Matāgaluega o Leoleo, Falepuipui ma le Ola Toe Fuatā’ina mo le umi e 3 tausaga.
Na mae’a lana Konekarate i le ogātotonu o lenei tausaga 2025, ma toe fa’ai’ugāfonoina ai e le Kapeneta ua mavae e fa’aauau pea i ona tofiga se’ia toe tofia se tasi i lea tofiga.
Peita’i fa’ailoa manino e Mulipola, na iloilo e le Kapeneta le lipoti a le Ofisa o le Komisi o Galuega a le Mālō [PSC] ma fa’ai’ugāfonoina ai, o le ā toe fa’asalalau lea avanoa mo le isi fa vaiaso.
O le fa’amae’a ai ona tau’ave e ‘Au’apa’au le tofiga fa’a-Komesina, ua fa’ase’e atu ai le va’aiga o le Matagaluega i le afioga iā Leiātaua Samuelu Afamasaga.
Na fesiligia e Tusitala i le feiloā’iga ma le afioga i le Minisitā i le asō, pe ua fa’amuta aloā’ia [terminate] le tautua a ‘Au’apa’au. Peita’i na tali manino Mulipola, o lana Konekarate ua mae’a, ma o lo’o avanoa lava le tofiga o le Komesina e toe tusi talosaga ane i ai le afioga iā ‘Au’apa’au pe ā finagalo iai.
Na fa’asalalau muamua le avanoa Komesina peita’i ane ua toe fa’asalalau fo’i mo le isi 4 vaiaso, i le finagalo o le Kapeneta, ia tatala pea le avanoa mo nisi mai Samoa nei ma atunu’u e mamao, e talosaga i lenei avanoa tāua a le Mālō.
O le asō, ua fa’amavae aloā’ia atu ai le afioga iā ‘Au’apa’au mai le Matāgaluega o Leoleo, Falepuipui ma le Ola Toe Fuatā’ina.
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
