Faafetai Samoa i Lau Tapuaiga.
Ou te mata’utia fa’atulou e pei o le tala i le maimoaga a le Sa’opāpā, e faigatā Samoa le Atunuu pele.
O oe o le titi, O oe o le pale, O oe o le sei ma la’u asoa ou te tiu fa’amatala’oa ai i le lalolagi i mea nei o fa’agatama.
Tulouna ia ou sā ma faigā fa’alupe fa’aleaganu’u. Ta’oto fo’i ou mamalu ma paia taulagi fa’alēmālo, ae matua lava le tu’u i le ‘Aufaigaluega totofi a Le Atua i fatafaitaulaga e fia, tulou ia.
Tulou ia, Tulou lava!
O le muāfetalai masani lava a le Atunuu e faapea, “O faiva e tapuaia, e a’e ma le manuia”.
E faapena se lagona o lo’u nei fa’atauva’a ma le Pulega o le tatou Manu Samoa Sevens e fa’aleo atu ai la matou fa’afetai tele i lau tapuaiga Samoa le Atunuu pele a’o alofaiva au tamafanau e saili so tatou ‘ai i le toe ta ma le taulaumea o tausinioga Ta’ito’afitu a le Lalolagi o lenei fo’i tausaga.
Ua faamalo tatalo, ua faafetai le titifaitama. Samoa ma lau tapuaiga.
E ui ua lē ōgatasi le futia ma le umele i se taumafaiga sa alo atu iai āu tamafanau. Ae sa loto lava i le asane ma saili i le sogā se manu auā oe Samoa, ae ua pau o se taumafaiga vaivai a lau Manu Samoa Sevens.
Ae matou te tatalo atu i lau tapuaiga fa’amatua alofa Samoa, ina nei o’u malolo ona e faagalo lea o ita. Ae maualuga pea i le agaga oe o le matua faitama matou te malu ai.
Ae faatili foe mo le a’e auā so tatou avanoa mo le Olympics i nisi o taamilosaga o mulimuli mai.
Samoa! O alofa na, o alofa nei, o alofa fo’i ia tatou te momoe!
Soifua ma ia manuia,
Faiaoga ma le Pulega
Manu Samoa Sevens
(548)
