Momoli e Matautu lo latou Sui i le HRPP mo le Faigapalota Laititi

0
3327

O le asō na momoli ai e Alii ma Faipule e le afioaga o Matautu, Apia le latou sui mo le faigapalota laititi i le vaega faaupufai o le HRPP.


O Samau Solitama’alii Timani Samau, 59 tausaga lona soifua, na momoli aloaia e matai o le afioaga o Matautu i le vaega faaupufai e Puipuia Aia Tatau a Tagata.

O le fetalaiga ia Popoalii Kalepo sa fai ma fofoga o le afioaga.

“E tumau le lagolago, aemaise e tumau le faatuatuaga a lenei nuu i le vaega faaupufai, o le ala lea ua tasi ai le tofa i aiga ma lenei nuu, matou te omai e tuu atu le sui ua matou filifilia mo le faamoemoe o loma nei.”

Na tali faitau le Peresetene o le HRPP le afioga i le Gafatasi ia Fuimaono Sam Te’o, e faafetaia le paia o le afioaga i se tofa ua a’e ma se faautaga saili ma le tofamamao, ua tatou laulua fesilafa’i ai le laumua nei Petesa.

Na saunoa Fuimaono o faamoemoe faapenei e le faigofie. “Na o le tagata e toa le loto e tulai mai e tauvā i filifiliga tofi o itumalo.”

Ae i le saunoaga a le taitai ia Tuilaepa Sailele Malilegaoi, na ia faafetaia ai Samau mo le saili Malo auā le afioaga ma le itumalo.

“O itu aso faapenei e lē faigofie, ae ia maua lou loto tele, maua le onosai, ma ia faamoemoe pea i le Alii, afai o le a le taunuuga, o le finagalo lena o Le Alii.”

Sa oo foi le saunoaga a Tuilaepa i le paia o le afioaga. “E faamoemoe le manuia o lo outou Sui ia outou.. o loo iina le tali..

“Ua masani foi taga o taaloga faapenei, e iai nisi o outou o loo saofafai mai, ae ese le Sui tou te lagolagoina, ae o le tuualalo, o lau filifiliga ma lau faaiuga fai, e manuia ai taeao.”

E lei finagalo Samau e tuuina mai sana faamatalaga ae ua ia saunoa, “seia iai se taimi”.

O le fetailaiga ia Samau, o se tasi ua iloga le faipisinisi, e le gata o le falepasi faapea lana fale laupapa. O se matai tausi aiga, ma se matai tausi Ekalesia foi.

O le maea o le feiloaiga ona faatino lea o aga masani a le atunuu i faa’aloaloga pei o le lafo o le failauga faapea le pasese o le afioaga.