E toatolu ni alii Malu o le Malo sa tuuina atu a latou molimau i luma o le Faamasinoga Maualuga o le asō, o le aso lua (2nd day) o taualumaga o le Faamasinoga o le mataupu o loo molia ai le tusitala lauiloa ia Papalii Sia Figiel, o loo tuuaia i lona faaooina o le oti i le Polofesa ia Dr Caroline Sinavaiana-Gabbard.
Sa tula’i le Satini Sinia ia Lelefu Maatusi, o lë sa Taitai i le Ofisa o Leoleo i Poutasi, ma tuuina atu lana molimau.
O le taeao o le Aso Sa 26 Me 2024, ina ua lata ina manava le latou sifi (8am) i lena taeao, ae taunuu atu loa se valaau mai se tinā e igoa ia Sesilia Ala’ilima mai Lotofaga. Sa faapea atu Sesilia, o loo iai se tino maliu o loo taatia i se fale o lona tausoga ia Sia [Papalii Sia Figiel].
Taunuu atu i le fale sa maua atu iai le tino maliu
Sa agai atu loa le Satini Sinia ma nisi leoleo se toalua ia Steven Tonumaipea ma Tavete Muavae i le maota o Papalii Sia i Vaivase-Uta. Sa latou tālia ai iina Sesilia Alaiilima, sa alu atu ma le ki o le fale.
Ina ua tatala mai le fale, sa molimauina e leoleo le pisipisia o le foloa o le fale i le toto, ae o loo ufiufi i ni ie e pei o ni solovae.
Sa latou vaaia se sefe tioata o loo i luma mai o se faitotoa o se tasi o potu o le fale. O luga o lenei sefe sa latou vaaia ai se samala ma se tamai naifi (kitchen knife).
Ina ua si’i ese le sefe tioata, sa taatia mai ai se faitotoa o loo tu’itu’i ai i fao ni taga lapisi uliuli, e cover ai le faitotoa.
Ina ua tatala mai le faitotoa, sa vaaia ai loa se tino maliu – o loo afiafi i taga lapisi uliuli.
“Sa matou faalogoina le manogi (sei tulou) ma ua le mafai fo’i ona taofia le lago mumu.”
Na agai atu loa leoleo faapitoa o le forensics ma pueina ata o le siosiomaga o le soligatulafono (crime scene). Sa ia talatala eseina pepa lapisi uli, ina ina mafai ona pue lelei ata o le tino maliu.
E tolu lelei ni folder poo ni album o ata sa tuuina atu i luma o le Faamasinoga e le leoleo faapitoa forensics, e aofia ai ata o le tino maliu.
O nai leoleo foi ia e toatolu sa mua’i taunuu atu i le faalavelave, sa latou si’iina maia i fafo le tino maliu ma tuu atu loa i totonu o ato faapitoa (body bag) ma agai atu ai loa i le falemai.
Caution Statement
Molimau Lelefu Maatusi, sa ia taunuu atu i le Ofisa o Leoleo i Apia, o loo nofo mai ai Papalii Sia, ma o loo maligi lava ona loimata.
Sa ia faailoa atu ia Sia ona aia tatau masani, ma faamauina ai foi ana tali (caution statement).
Sa faailoa le aia tatau e taofia ai sana faamatalaga (right to remain silent) ma lona aia tatau e fai ai sana loia (right to an attorney).
Fesili: E te manao e sailia sau loia? Ae Tali Papalii Sia: E leai.
“E leai se mea ou te mana’o ai i se loia, ona o a’u lava na faia le solitulafono ia Caroline.”
Ina ua kolosi le tamaitai loia ia Unasa Iuni Sapolu, sa ia faapea atu i le Satini Sinia – e lē valaauina e Sia le polofesa ia Caroline, ae na te faaigoaina ia Sina.
Na tali Lelefu, o le mea lava sa fai mai ai Sia, na faamauina. E le’i suia e leoleo se faamatalaga.
Molimau o le Aso Muamua
I le aso muamua o le Faamasinoga i luma o lana afioga i le Faamasino ia Fepuleai Ameperosa Roma, sa molimau ai se matai mai Vavau, faapea se taulealea e faigaluega i le turisi o le Vavau Beach Fales.
Sa la molimauina le taunuu atu o Papalii Sia i le 6 i le afiafi, o le Aso Faraile 24 Me 2024 i le turisi o le Vavau Beach Fales, ma ia tauanau pe mafai ona moe ai i ō.
Sa tali atu iai Mita’i Liliau, o fale, e na o le ao e avanoa ai le auaunaga mo tagata tafafao atu, ae leai se eletise poo ni faamalu e momoe ai nisi. Peitai, sa tauanau pea Papalii Sia, ma ia tuuina atu ai Mita’i se $40 tala e moe ai.
Sa agai atu Mita’i i le matai matua o le nuu ia Losalosi Malologa Tuu, ma aumai ai le faatagaga e moe le tina lea, ma le faatonuga a le matai, e nofo ai ma Mitai, e vaai lelei le tina ina ia saogalemu o ia.
Peitai, e ala mai Mitai i le 5 i le taeao, ua leai Papalii Sia, ae na o le taavale Rav 4 lanu uliuli sa alu ati, o loo tu pea.
Na molimau Losalosi Malologa – o le ta o le 8 i le taeao sa taunuu atu ai i le turisi. E oo atu o loo sue le tinā, ma faaauau ai pea ona fesoasoani i le tau sailiga o Sia.
E maua atu i le togavao, o loo taatia mai i luga o maa. O loo ufiufi lona ulu i ni lau laau. Sa agai atu le matai ma taumafai e faanofo i luga ma lomi lona ulu ma tauau.
O le molimau a le matai matua, “O la’u vaai, o se tina sa tupu ai se faaletonu.”
Sa faapea atu Papalii Sia – e le mafai ona alu ese ona o loo pe lana taavale. Peitai sa molimau Losalosi Malologa, o ia lava na alu atu loa ki le taavale. E ki atu lava ma ola.
Sa fai loa le matai matua i lea tinā, e sili le sau loa e alu, ona o lea ua ola lana taavale.
Tausoga o le Polofesa
Sa molimau foi le tausoga o Dr Caroline, le afioga ia Aiolupotea Goretti Wulf. I le taimi o le molimau, sa le mafai ai ona tālia le loimata maligi o lea tina, i le faamatalaina o le taimi sa tau saili ai lona tausoga, ae maise o le taimi sa ia vaaia ai le tino maliu.
O le Aso Faraile 24 o Me sa gata ai ona vaaia o ia e lana teine faigaluega. O le Aso Gafua 27 Me, lea sa valaau atu ai loa le teine faigaluega iā te ia, mo se fesoasoani e sue ai le polofesa.
Sa molimau Aiolupotea, sa ia lē malolo loa i le tau sailiina o si ona tausoga. Ua vili i le falemai po o iai ni tagata lavevea na faaoo atu mai se faalavelave faafuasei.
Ina ua valaau atu i le ofisa o leoleo, ae faapea mai loa leoleo, e susū atu se’i fai se latou tala.
Ina ua taunuu atu i le Ofisa o Leoleo, sa ia maua ai loa le faamatalaga ua maliu lona tausoga, e uso tina o la tina (our grandmothers are sisters).
Sa faapea atu leoleo, ua leva ona latou tau saili se tasi o le aiga, ae ua lelei ua faafetai ina ua ia oo atu.
Sa faigata tele ona toe faamatala e Aiolupotea le tulaga sa ia vaaia i le tino maliu o lona tausoga ina ua latou agai atu ma leoleo e faasino poo Dr Caroline tonu lea (identify the body).
“Sa matuai afaina lava lona mata taumatau, ma lona ua o loo iai se oosi telē. Sa faigata tele ona vaavaai atu i se tagata o si ota aiga o taoto mai faapea..”
Faaauau pea le faamasinoga
O le aso Lulu 20 Aukuso e toe faaauau ai iloiloga o le Faamasinoga i lona aso lona tolu.
Sa faailoa mai e le tamaitai loia ia Taimalelagi Leinafo Strickland, o le latou molimau mulimuli ia Sesilia Alailima, o loo i Niu Sila. E toe foi mai i le vaiaso muamua o Setema.
O lea ia talia ai e le alii Faamasino, le toe faaauau o taualumaga o le Faamasinoga i le vaiaso muamua o Setema, e molimau ai Sesilia Alailima.
- Toa Samoa Rewrite Record Books in 78–4 World Cup Rout of France - October 17, 2026
- Carrying Samoa from Salailua Palauli to the International Stage - October 16, 2026
- Prime Minister Commends Samoa Basketball’s 50% Local Player Policy: Go with Confidence, Play with Heart - October 16, 2026
