Molimau le Toalua Muamua o Kolani Lam

"Lau Afioga e iai le taimi na mao ai le po a Kolani i lo'u gutu."

0
2312

O le aso lea na valaau ai e le itu a lē o loo molia le toalua muamua o Kolani Junior Lam e molimau e tusa ai o le mataupu o loo fa’atino ai nei le suesuega a le faamasinoga maualuga i luma o le tamaitai faamasino ia Mata Tuatagaloa.

Sa maliu Sa’u Justina Sa’u i le aso 21 o Oketopa 2018 ma o loo moliaina lona toalua faaipoipo ia Kolani Junior Lam i lenei mataupu. O loo tetee Kolani, e leai, o Justina sa ia maua atu ua pule i lona ola e ala lea i le sisiina o lona ua sei tulou, i se maea e tāupe i le vineta o loo i tuafale o le latou aiga i Sinamoga.

O Aiva Toa Kalati, 32 tausaga o le soifua, sa fai ma toalua faapouliuli muamua o Kolani. Sa ia taua e 11 tausaga o nonofo ma Kolani ma e toafa o la alo, ae lei faaipoipo i laua.

Sa faafofoga le faamasinoga maualuga i le talaaga o lenei tina. O ia o se tina fai pisinisi nonogatupe laiti, ma o le taimi nei ua toe fai le isi ona toalua ma ua atoa le tausaga talu ona faaipoipo.

E toafa le fanau ma Kolani, toalua tama o le masaga, ma teine e toalua. Sa ia taua foi sa faaaooga e le ua maliu, Su’a Justina Sa’u, le la fanau ma Kolani.

O uiga o Kolani na faamatalaina e Aiva, o se tagata alofa, e loto maualalo fo’i, e iai taimi e siisii ai le leo ae e saili lava auala e fefaasoaa’i ai e faafo’ia ai le faafitauli.

“A iai se mea e le fiafia ai Kolani poo a’u foi, one of us has to walk away, ma te le faia ni uiga misa i luma o la ma fanau.”

“O le leo o Kolani e pei e demand pe a manao i se mea, it’s just the way he is, ae o le tama e alofa.”

Sa tuliloa e le tamaita’i loia a le itu a leoleo ia Leone Su’a-Mailo le tina ia Aiva i le taimi na tete’a ai ma Kolani.

O lea o loo ua maea ona molimau Kolani, o le 2014 na tete’a ai, peitai o loo faapea mai Aiva o Aokuso i le 2015 na tete’a ai.

O le tala a Aiva, sa malaga atu i Amerika mo le saili o se lumanai o le fanau, ae faalogo mai ua iai mea ua tutupu i lo la aiga; o lea na toe fo’i mai ai loa ia Aokuso o le 2015 ma faauma le mafutaga ma Kolani.

Na fesili Leone pe mai lava i lea taimi o loo maua pea le la fesootaiga ma Kolani, ona o lea sa mafai ona ia pikiina tamaiti, ma sa oo ane foi i Sinamoga.

Sa tali mai Aiva e leai o le faaiuga i le faamasinoga mo le la fanau, e tasi le masina ia te ia tasi le masina ia Kolani.

Sa toe tuliloa lava e Leone o le masina lea na te pikiina ai tamaiti ma oo atu Sinamoga o lona uiga e le tasi se taimi sa oo ai i Sinamoga. Sa fesiligia e Leone taimi na fesootai ai ma Kolani i telefoni, ma e lē faatasi foi ona oo i Sinamoga pe a fuafua atu i le tausaga atoa.

Sa tali Aiva e sa’o, o ia e masani ona oo i Sinamoga.

Sa fesiligia foi e Leone pe sa ia iloa o loo totogi e Justina pili aoga a le masaga, ma sa tali Aiva o Kolani sa totogiina.

Na toe tuliloa foi e Leone pe na te silafia o le 2017 lea na le toe faigaluega ai Kolani, ma o pili a lana fanau, sa totogi e Justina pe sa ia silafia lea tulaga.

Na tali mai Aiva e sa’o lelei.

Sa tuliloa foi Aiva i lana mau lea o loo faapea mai o Kolani o se tagata e tumu i le alofa. E alofa i lana fanau, e oo lava i le taimi sa la tete’a ai sa provide lava e Kolani seleni mo lana fanau, ao faigaluega.

Na toe polili atu le fesili a Leone…”O lea ete fai mai o Kolani e le o se tagata fasi ava. O e silafia o lea na molimau Kolani sa oo lona lima ia Justina?”

Na tali mai Aiva na te le iloa, sa toe faapea atu Leone, “O lona uiga e te faaseseina le mau a Kolani? ma e mai le sefulutasi tausaga talu ona lua nonofo ma Kolani, e le’i oo lava le lima o kolani ia te oe?

O i na toe sui ai loa le tali a Aiva.

“Lau Afioga e iai le taimi na mao ai le po a Kolani i lo’u gutu.”

O le mau a Kolani i le faamasinoga i le vaiaso talu ai, e le’i atoa se tausaga talu ona nonofo ma Justina ae oo lona lima iai, ma e sili laitiiti atu foi ma le tausaga talu ona la nonofo, ae tago liai le tipoti, tau i le ulu o Justina.

O loo faaauau pea mau a le itu a lē o loo molia i le faamasinoga maualuga.


Maina Vai