Ua molia e leoleo se tasi o tamaitai sa malaga mai fafo, ona o se tagi na faaulu e le failautusi a le FAST, e tuuaia ai, ua tauleagaina e lenei tamaitai sui o le vaega upufai.
O lea ua faamaonia mai e le Sui Komesina o le Matagaluega Leoleo, Papalii Monalisa Tiai-Keti, le tulai ai lea o se tasi o tamaitai e aumau i atunuu mamao, e tali atu i moliaga o lona faia lea o ni gaioiga poo ni faamatalaga e faaleaga ai nisi o sui o le Faatuatua i le Atua Samoa ua Tasi (FAST).
Saunoa Papalii, “O le Aso Gafua o le vaiaso nei na faailoa ai e le Matagaluega Leoleo i lea tamaitai ona aia tatau faaletulafono, ina ua ma’ea ma mautu suesuega a leoleo.”
“O se aso o le masina o Oketopa o le a tulai ai lenei tamaitai i luma o le faamasinoga faaitumalo e tali atu i ona moliaga, o lona faaogaina o itu faatekinolosi ma ala fa’aagafesootai faaonopo nei (social media) e faia ai ni faiga faasoesa (harassment) e faasaga i nisi o sui o le Faatuatua i le Atua Samoa ua Tasi.”
Faailoa e Papalii o lenei tamaitai e aumau i atunuu mamao, ae na malaga mai e asi ona aiga i Samoa.
“Peitai, ona o se tagi sa faaulu mai i le Ofisa o Loleo e le failautusi a le FAST, Va’aaoao Alofipo, lea na mafua ai ona faatino suesuega nei e faasaga ia te ia.”
O loo tatala nei i tua lenei tamaitai i aiaiga e saini ai i le ofisa o leoleo i Faleolo i vaiaso taitasi, faatasi ai ma le taofia o ona pepa malaga.
O lenei tamaitai sa faailoa e le failautusi a le FAST, e faapea e aumau o ia i Utah, i Amerika.
O le to’alua ai lea o sui o le atunuu ua aafia i mataupu faapenei, ina ua faaulu atu e le failautusi a le FAST ni tagi e tuuaia ai lo latou lafoina o ni faamatalaga e aafia ai sui o le vaega faaupufai.
E lei mamao atu le toe soloia o se mataupu e faasaga i se alii faasalalau, Tiumalumatua Maifea Fetu, sa malaga mai foi i atunuu mamao mo fonotaga a le Ekalesia Metotisi i Samoa. Sa tuueseina e le Faamasinoga lea mataupu ina ua le lava molimau e lagolagoina ai tuuaiga faasaga ia Tiumalumatua, e faapea sa ia faia ni faamatalaga tau faaleaga (to defame).
(1)
