12 Tesema, 2019. Mulinuu, Apia. O loo molia i le faamasinoga se tina e suafa ia Leuluaialii Selesitina Vaaulu i moliaga o le faapāina lea o se laau malosi ituaiga o le “Remington model 22 pump action rifle” ma le faamoemoe e taufaamatau ai e fegasoloa’i i le afioaga o Solaua, Saoluafata.
O isi moliaga o le fuafua e faaoo le oti ia Mike Soo Choon o se tane o Solaua Saoluafata, faapea ai ma le moliaga o le faaaupegaina i se aupega malosi e aunoa ma se mafuaaga tatau faatulafonoina.
O loo moliaina foi i le fuafuaga e faaoo manuaga tuga (Grevious Bodily Harm) ia Mickey Pii o se tane mai le afioaga o Solaua Saoluafata.
O loo teena e lea tina ona moliaga, ma ua faatulaga mai e le alii faamasino ia Leiatauesa Daryl Clarke le aso 17 o Aokuso o le tausaga fou e fofoga ai molimau a le itu a leoleo.
O loo tatala i tua le ua molia ae sa poloaiina ina ia nofo i le latou aiga i Moataa, ae aua nei toe oo atu i Solaua.
O le aso Gafua na mavae nei sa toe tulai ai lenei tina ma lana talosaga e ala atu i lana loia, e fia tuua le atunuu mo se taimi.
Sa teena e le tamaitai loia ia Leona Su’a-Mailo o loo tu mo le itu a leoleo.
Sa momoli le talosaga a Leuluaialii Selesitina e le loia o loo tulai mo ia, le afioga ia Tauiliili Lefau Harry Schuster.
O taeao Aso Faraile 13 Tesema e aumai ai e le itu a leoleo le latou tali i le talosaga lea ma fai ai le faaiuga a le faamasinoga pe faataga ona malaga ese atu ma Samoa le ua molia.
O le faalavelave lenei sa tulai mai i le afioaga o Solaua i Saoluafata i le aso 29 o Oketopa le tausaga nei.
(0)
