Molia se Tamā i le Fasioti Tagata Faamoemoeina i le Maliu ai o lona lava Atalii 12 Tausaga

Ua faamaonia mai e leoleo le molia ai o se tamā 39 tausaga mai Palisi, i le maliu ai o lona lava atalii e 12 tausaga.

I se tali mai o le Sui Komesina o Leoleo le afioga Papalii Monalisa Tiai-Keti i ni fesili a le Samoa Global News na ia faamaoniaina ai, o se atalii o lea tamā na faaumatia le soifua, ae lē o sona afafine e tusa ai ma nisi o lipoti a ofisa faasalalau.

Saunoa Papalii Monalisa, o le faalavelave na tulai mai i le vaiaso talu ai i le afioaga o Palisi.

“O le suesuega a le Matagaluega e fua i manuaga sa vaaia i le tino o lea atalii, o se mea faitino malō (hard object) sa fa’aogaina e lea tamā e sasaina ai pe faaoolima ai i lona atalii.”

Saunoa Papalii ua molia nei lea tamā i le moliaga o le fasioti tagata faamoemoeina, ma o loo taofia nei o ia i lalo o le vaavaaiga a leoleo e talia ai le Aso 30 o Ianuari 2023, o le a tulai ai i luma o le Faamasinoga Maualuga e tali atu i ona moliaga.

I se isi foi faalavelave na aafia ai le fanau laiti – o le vaiaso na te’a atu nei sa valaau ai i luma o le Faamasinoga Maualuga se mataupu o loo molia ai se tinā 37 tausaga o Toamua ma Safotu i le fasiotitagata paivalea.

O loo tuuaia lenei tina i le maliu ai o lana tama teine, ae mafua mai i se maa sa ia togiina ae tau i le ulu o si ana tama.

Saunoa Papalii, o se faanoanoaga tele i le Matagaluega ona o le tulai mai o nei ituaiga faalavelave, ma ua lē asa lava se masina ma faalavelave e maimau ai soifua o fanau.

O le tuualalo ma le fautuaga mai le Matagaluega i matua, ia faagesegese le ita, ma ia lava se taimi e mafaufau ai ma le toto’a i tua atu o se gaioiga poo se faatinoga, poo talafeagai ma le tulafono aemaise o le aafia ai o mafutaga ma fanau.

O le mau a le Faamasino Sinia o le Faamasinoga Maualuga o Samoa le afioga ia Vui Clarence Nelson, e lē tatau ona faaogaina le sasa e a’oa’i ai le fanau, ona e eseese uma fua a tagata i le mamafa o le tā.

I sana saunoaga fai pea, e faapea mai ai le afioga i le Faamasino Sinia, “E ta’u e outou o le sasa, ae ou te ta’uina e a’u, o le faaoolima, ma o le solitulafono foi lea.”

O le tino maliu o lea atalii 12 tausaga faapea foi le tino maliu o le afafine 13 tausaga, ua maea ona faia iai taotoga faapitoa e tusa ai ma suesuega a leoleo i le mafuaaga tonu o manuaga i o la tino ua mafua ai le maliu.

Saunoa foi le Sui Komesina ia Papalii, o tino maliu o le fanau faapea ma se alii mai Lalomalava Savaii sa maliu i se fe’eseeseaiga na tulai mai i le vaiaso ua tea, na atoa iai le 12 o taotoga faapitoa sa faatinoina e le fomai tomai faapitoa mai Fiti (pathologist).

E 12 tino maliu sa faia iai ta’otoga faapitoa i totonu o le 30 aso lea sa auai mai ai le fomai tipitipi faapitoa mai Fiti.

O le tatalo a le Sui Komesina, ia maua e Samoa le filemu mai le Alii, ae maise o le saogalemu i lenei vaitau o le Kerisimasi ma le Tausaga Fou.

(0)