Molia se Satini i Sauaga Mataga i se Tamaitai Leoleo

0
1599

O le vaiaso nei sa tula’i ai se Satini Sinia Asiasi (Senior Inspector) i luma o le Faamasinoga Maualuga ina ua molia o ia i sauaga mataga aga’i i se tasi o tamaitai leoleo.

E lua moliaga o le faia o amioga mataga (indecent assault) o loo molia ai se Satini ua silia ma le luasefulu tausaga o galue i le Matagaluega o Leoleo.

O le lua vaiaso talu ai na lipotia ai lenei faafitauli e le tamaitai sa aafia. Sa faatino ai loa suesuega a le ofisa ma tuuina atu ai moliaga e pei ona folasia i luma o le faamasinoga.

I taualumaga o lenei mataupu, na tuuina atu ai se talosaga a le Ofisa o le Loia Sili o loo tulai mo le itu a leoleo, ina ia faasee ese lenei mataupu mai le Faamasinoga Maualuga, ae tuuina atu i le Faamasinoga Faaitumalo.

E mamafa atu ai moliaga e iloilo i le Faamasinoga Maualuga nai lo le Faamasinoga Faaitumalo.

Na talia e le faamasinoga le talosaga ma ua faatulaga ai le Aso 12 o le masina nei e fofogaina ai lenei mataupu e toe valaauina i luma o le Faamasinoga Faaitumalo.

E le’i iai se loia na tula’i mo le ua molia.

O le toe tolopoina o le mataupu e pei ona tā’ua e le alii Faamasino ia Fepuleai Ameperosa Roma, o se avanoa e mafai ai ona saili se loia e tula’i mo ia.