Sa tulai se alii talavou mai Vaivase Uta i luma o le Faamasinoga Maualuga ina ua molia i le talepefale ma le gaoi i se tasi o pisinisi i Tauese.
O le tuuaiga a leoleo e 15 ni fagu malosi, ma fagu Taula e 50 sa toesea e lenei alii talavou mai le pisinisi o le Cocktails on the Rocks.
E $3,360 le tau aofai o oloa na toesea, peitai, ina ua tula’i lenei alii talavou i luma o le Faamasinoga Maualuga, sa ia teena ai le aofai o fagu malosi na ia avea.
E tusa ai ma le folasaga a lea alii talavou i luma o le Faamasinoga Maualuga, “E na o le fa fagu malosi ma le tolu pusa pia o le Taula na ou aveesea.”
I le tolaulauina o le itu a leoleo, na folasia ai i luma o le Faamasinoga Maualuga, o le aso 26 Ianuari o le tausaga nei, na faaleagaina ai e lea alii talavou le fale o le Cocktails on the Rocks i Tauese.
Peitai, o lana folasaga i luma o le Faamasinoga, sa ia teena ai e lē 15 ni fagu malosi e pei ona tolaulauina e le itu a leoleo.
Sa maea lea mataupu ona toe tuuina mai foi lea i luma o le Faamasinoga nisi moliaga o le talepe fale na tulai mai i le Aso 15 Setema 2022, e faasaga foi i le alii talavou lava lea e tasi.
O le afioga i le tamaitai loia ia Sifuiva Maureen Tuimalelifano o loo tulai mo lē o loo tuuaia.
Sa toe tolopo e lana afioga Fepuleai Ameperosa Roma lenei mataupu sei toe fofogaina i le Aso 3 o Aperila, ae sei toe tagataga’i le itu a leoleo i moliaga e pei ona feteenai ai ma se faamatalaga a lē ua molia.
- 177 Moliaga o le Gaoi a o Avea ma Tagata Faigaluega o le National Bank of Samoa - December 4, 2023
- Toe Tolopō i le 2024 le Mataupu a lē sā Gaoi le $1.5 Miliona mai le ANZ Samoa - December 4, 2023
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
