Sa tulai se alii talavou i luma o le Faamasinoga Maualuga i le taeao o le Aso Gafua, e tali atu i ni moliaga e aofia ai le taumafai lea e faaoo le oti (attempted murder) i lona lava tausoga.
O Enesi Ili, 26 tausaga mai le afioaga o Afega, na tulai i luma o lana afioga i le Faamasino ia Fepuleai Ameperosa Roma, ina ua valaauina lenei mataupu mo le uluai taimi (first mention).
Sa fesiligia e Fepuleai le ua molia pe iai sana loia e tu mo ia, ae tali le alii o Enesi, e leai, ona e lima vaivai lona aiga.
Na saunoa Fepuleai, “O lea ou te vaai atu i faamaumauga a le itu a leoleo, e fai sina ogaoga o moliaga, e aofia ai ma le attempt to murder, poo le taumafai lea e faaoo le oti.”
Sa sii ane le aao o se tasi tina i totonu o le potu faamasino, ma tuuina atu iai e Fepuleai le avanoa. Na savali atu lenei tina i luma ma faapea mai, o “O a’u o Repeka le tina o Enesi o loo molia nei..”
“O lo’u uso e onaina lana tama lea na aafia..”
Sa tatalo lenei tina i luma o le Faamasinoga, ina ia mafai ona tatala i tua lona alo (on bail) e talia ai le faasologa o lenei mataupu.
“Lau afioga i le Faamasino, ua uma ona teuteuina le mataupu ma uia foi tulaga faaleaganuu, ae talosagaina lau afioga le Faamasino i se avanoa e tatala ai si au tama i tua faamolemole.”
Na fesiligia e Fepuleai le tina ia Repeka, poo iai se isi o matua o le ua aafia i totonu o le potu faamasino. Na tali Repeka, “O loo i inei le tua’a poo le toalua o lo’u uso.”
Na faapea mai le Alii Faamasino, “Se’i tula’i mai..”
Na tula’i lea tama, ma faailoa atu i le Alii Faamasino e le’i te’a le tiga o le latou aiga ona o le faalavelave na fa’ato’a tula’i mai i le vaiaso na te’a nei, ae ogaoga tele manuaga o lona atalii, e aofia ai le motu ese o lona lima ma lona vae.
“Lau afioga i le Faamasino, o a’u o Fata Viane, o lo’u atalii lea e aafia..
“E moni le tina, ua ma’ea ona teuteu le matou mataupu, ae peitai, e talosagaina lau afioga, e ‘aua nei tatalaina mai i tua Enesi..
“O a’u e toatele foi la’u fanau tama, ou te manumanu nei toe tupu mai se isi mea ona e lei leva – o le vaiaso na tea nei na tupu ai le faalavelave…
“O loo i le falemai i Motootua lou atalii, ua motu lona lima ma lona vae..
“Faamolemole e talosagaina lau afioga, aua nei tatala maia i tua ae loka pea.”
Na tuuina mai e Fepuleai le lua vaiaso e tolopoina ai lenei mataupu, ma le fautuaga i le ua molia, “O le avanoa lelei lea e e saili ai sau loia i lalo o le polokalame fesoasoani a le Malo e totogi ai sau loia e tulai mo oe (legal aid), ae o le a fa’aauauina pea ona taofia oe i lalo o le vaavaiga a leoleo.”
Na maitauina le maligi o loimata o le tina ina ua le mafai ona tatala i tua lana tama, ma toe faafoi ai i Tanumalala o loo taofia ai.
