Ua faamaonia mai e le Komesina o le Matagaluega o Leoleo, Auapaau Logoitino Filipo, le molia ai lea e leoleo o se alii talavou 22 tausaga i lona faaoolima lea i se tamaitai palagi.
Saunoa Auapaau, o le vaveao o le Aso Tofi talu ai, Aso 8 Setema, na tulai mai ai lenei faaletonu.
“O le alii talavou na soli tofaga i se tamaitai palagi o loo i Sanoa nei i le pueina o le ata Survivor mai Ausetalia.
“Na tē’ia gaigoiga a lea alii ina ua vave ona ala le tamaitai palagi, ma faaoolima ai loa lenei alii talavou ma sola ese ai.”
Na sola ese lē sa faia lea gaioiga ae sa vave ona logo leoleo ma faailoa iai le mataupu.
I se faamatalaga a le afioga i le Komesina, o sa faamauina e leoleo se faamatalaga a le tamaitai palagi, i foliga o le alii talavou ma lona fuaitino.
Ua tuuaia nei se alii talavou sa maua mai e leoleo, e faatusa i le faamatalaga faamauina a lē o loo aafia.
Saunoa Auapaau: “Na faafaigofie le galuega saili a le Matagaluega o Leoleo ona o le fesoasoani mai o nisi o le afioaga, na vave ai ona maua le alii talavou”.
E lua moliaga o loo molia ai le alii talavou.
1. O le ulufale faasolitulafono i le taimi o le pogisa;
2. Faaoolima i se tamaitai palagi.
O le tamaitai palagi o se tasi o le aumalaga a le Survivor mai Ausetalia o loo faamautu i Salamumu mo le pueina o se vaega o le latou ata faasolo.
O le aso 26 o le masina nei o le a tulai ai lenei alii talavou ua tuuaina nei i luma o le faamasinoga maualuga.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
