Molia se alii satini leoleo sa tauva i le faigapalota i lona faia o amio mataga i se tasi leoleo tamaitai

0
97

O se alii leoleo Satini, ae o ia fo’i sa tauva i le faigapalota o Aperila 2021 mo le itumalo o Falealili 2, o loo tuuaia i lona faia o sauaga mataga tau feusuaiga i se tasi o tamaitai leoleo.

O Laauli Magic Junior Talataina, poo Fuimaono Taala Laauli Talataina e pei ona tauva ai i le faigapalota laititi ia Novema 2021, e silia ma le 10 tausaga o tautua i le Matagaluega o Leoleo.

O le masina talu ai na lipotia ai le faamalolo o le Satini ao faagasolo suesuega a leoleo i lea mataupu.

Ina ua valaau lenei mataupu i luma o le Faamasinoga Maualuga, sa tula’i le tamaitai loia mai le Ofisa o le Loia Sili (Prosecutor) le afioga ia Lupematasila Iliganoa Atoa, ma talosagaina se taimi faaopoopo, seia faamautu mai ai moliaga a le itu a leoleo.

I faamaumauga a le Faamasinoga e lua ni moliaga o loo tuuaia ai le alii satini i le taimi nei, ae le’i aumaia moliaga mulimuli (final charges).

O le tamaitai leoleo o loo aafia ma tuuina atu lana tagi, e faapea e na o le 21 ona tausaga ma e le’i leva fo’i ona galue ma tautua i totonu o le Matagaluega o Leoleo.

O se molimau mai totonu o le matagaluega e faapea o se tiute sifi po, na galulue ai le o loo tuuaia ma le o loo aafia.

O loo iai fo’i se isi mataupu i luma o le Faamasinoga Faaitumalo o loo tuuaia ai se alii Satini Sinia Asiasi (Senior Inspector) o loo molia i sauaga mataga aga’i i se tasi o tamaitai leoleo.

O vasega faauu o leoleo talu mai le lua tausaga talu ai, o loo matau ai le faatupulaia pea o leoleo tamaitai o loo ofi atu i totonu o le auaunaga, ma ua toatele atu tamaitai nai lo alii e faauu.

O le aso 20 o Me 2024 o le a toe valaau ai lenei mataupu i luma o le faamasinoga.


Brisin Manu Retzlaff-Lima